熱錢持續流入本港，上周金管局需要再次向市場注資，但聽講唔少熱錢係入嚟準備買人仔債券，難怪股市交投冇乜異動，昨日大市成交僅545億元。反觀深、滬股市昨日成交接近3,000億元人民幣，財氣逼人！滬綜指突破3,000點心理關口後，頭也不回，昨日收報3,124.67點，升36.3點。
巨額收購有睇頭
環顧全球，資金確實冇乜好去處，大家都在賭人民幣升值，同埋博中國經濟最先復甦，加上睇通喺「十．一」前，中央政府必傾盡全力催谷經濟，創造繁榮局面，所以炒家唔使多諗，一於繼續押注中國市場。
繼續聚焦中資股，保利協鑫（03800）早前宣布向大股東收購從事太陽能多晶硅及硅片供應嘅江蘇中能全部股權，作價263億港元。由於相對於保利協鑫嘅市值，是次交易涉額龐大，故頗為矚目。據講，公司將以現金、發行有抵押票據新股等方式支付交易代價。
多晶硅產能提升
老實講，相對於幾家國有電企來說，於前年底才掛牌嘅保利協鑫，可以話係一家唔起眼嘅外資獨立熱電廠營運商，旗下運營十八家高效能熱電廠、一家垃圾焚燒發電廠及一家風力發電廠，去年度純利1.3億元人民幣，每股盈利0.14元人民幣，乃去年少數喺煤價上升之下，仍然有錢賺嘅電企。
多晶硅係太陽能及電子業所用硅片嘅主要原材料，雖然江蘇中能開始商業投產才一年多，但去年已出售1,530公噸多晶硅及39.2兆瓦硅片，而今年首三個月則生產了1,094公噸多晶硅，估計今年全年目標產量為7,500公噸多晶硅。根據擴產計劃，到了今年底及明年底，其年產能力將分別增至1.8萬公噸及2.1萬公噸多晶硅，成為全球五大晶硅生產商之一。
不難獲基金垂青
由於江蘇中能去年已有利潤，今次作價估值有數得計，故毋須被龐大嘅金額嚇怕。若交易順利完成，保利協鑫將成為一家總資產逾200億元人民幣嘅大型環保能源企業。由於完成後大股東變相增持股權至56%，日後公司尚有發新股集資嘅空間，而以公司嘅資產，相信亦唔難吸引專門投資新能源產業嘅基金入股。
繼把江蘇中能借道保利協鑫上市後，日後大股東會否再施財技，重組旗下電業資產，則屬後話。總括而言，喺新能源股之中，呢顆「新星」唔簡單，發展潛力不容低估。