唔知係受琥珀（00090）超購1,250倍影響，抑或係嫌首日上市升得唔夠，故見秦發（00866）尋日發力升逾9%，就連半新股旭光（00067）亦見異動，相信短期之內，新股炒風仍會持續，值得繼續留意。

早前市場曾盛傳，內地將會進一步降低車購稅，但工信部昨日澄清，年內車購稅將不會擴大減徵範圍，消息對部分汽車股帶來一定打擊，好似東風（00489）昨日就跌4.6%，收報6.37元。其實，自從國家推出小排量車購置稅減半等一系列鼓勵政策以來，內地車市經已止跌回穩，而且自三月以來，每月汽車的銷售量都逾百萬輛，因此即使沒有進一步減稅，相信亦不至於令內地車市馬上回軟，只係之前汽車股的升勢是由政策牽動，昨日跟隨大市跌番啲，都只不過係依循遊戲規則而已。