行為良好 提早出獄

呢個消息尋日係市場傳出，創維專登出通告，證實黃宏生喺七月四日返咗屋企。太子傳媒老友尋日打佢手提電話時，佢電話都有響，聽啲響聲係喺大陸，但響到一半就畀人熄咗。於是老友就打畀創維嘅friend八吓，事關個市傳佢係提早保釋出獄嘅，點不知個friend證實黃總出咗獄，因為表現良好而提早咗放佢，究竟黃宏生會有啲咩新部署或者會唔會再重返創維呢？

老友話黃總想低調啲，暫時都無咩打算，話係咁話，老友聽講，黃總雖然喺「出事」之後辭咗創維主席個位，但黃宏生家族依然係公司大股東，而且就算坐緊監嘅時候，創維都會有專人每隔一段時間向佢報告公司嘅事務，雖然佢有相當一段日子都唔可以名正言順咁出任或參與公司事務，但坊間估計，彩電大王點會咁輕易退下火線。

黃宏生係喺○四年被廉署拘捕，○六年被裁定串謀盜竊同詐騙上市公司資產等罪名，判監六年，扣埋啲假，應該明年刑滿出獄。