新股霸王（01338）及秦發（00866）上周五掛牌，霸王全日高位見3.2元，收報3.03元，較招股價高27%，以其業務性質及盈利前景，以咁理想嘅估值上市，股價表現又咁好，公司大股東真係「行運」。至於秦發，高位見2.8元，收報2.68元，較招股價升11%，雖然表現未及霸王，但阿莊反而覺得，秦發上市初期收一浸貨，往後還會有一番作為，可以多加注意。

放大圖片	放大圖片	放大圖片

上周阿莊喺11元樓上沽出嘅中國忠旺（01333），本周起可以沽空，唔排除呢轉會踢上12元，但就要小心大戶一旦完成部署，隨時會出現一次較大型嘅調整，所以往後呢一、兩成利潤，都係留番畀別人賺！

講開組合持股，中保（00966）上周五表現出眾，高見18.44元，收報18.3元，升5.78%，由於走勢呈突破，阿莊正考慮增持多兩萬股。此外，上周五阿莊以平均價每股3.26元，買入10萬股天津港（003382）。

國策推動再生能源

國家信息中心最近發表嘅研究報告預期，到二○年，內地可再生能源總投資將超過3萬億元人民幣，成為經濟新增長點，而發改委早前亦調高二○年風電嘅裝機容量目標。講到新能源產業，專門做風電設備齒輪產品嘅中傳動（00658），受惠鋼鐵價格下跌，加上產品需求保持強勁，料年內毛利率及盈利可維持一定增長，現價具留意價值。

自上月初未能突破17元關後，中傳動股價便進行整固，喺15至16元水平已徘徊一個月，既然跌唔落，相信炒家遲早埋位玩番轉。小注怡情，若今轉能夠突破17元，或可觸發一次較大型嘅升浪，穿15元止蝕。