361度（01361）上市，太子傳媒老友去捧場，除咗見到361度總裁丁伍號外，仲有恒安（01044）副主席許連捷，原來佢哋好朋友兼同鄉，所以專誠來港捧場。新股掛牌，唔少得送禮畀港交所（00388），361度好有心思，送咗個北京鳥巢形狀嘅紫砂茶壺，由於佢哋來自福建，所以禮物係福建有名嘅特產紫砂茶壺。
361度好識搞噱頭，為提高公司產品知名度，上市前搞咗個舊換新送波鞋大會，當日送出361對波鞋，又搵明星古巨基同Angelababy設計波鞋。之後又喺投資者推介會，請咗模特兒同港男着上公司嘅運動衫同波鞋，引起投資者注意。
仲有，公司定價係3.61元，上市編號係1361，咁容易記，難怪間公司名深入民心！