本周三隻新股將會齊齊登場，其中361度（01361）更於今日掛牌，招股價3.61元，執筆時向卜架查詢，暗盤價去到4元樓上，認購「中獎」者料可穩拿一成利潤。另外，本周五霸王（01338）及秦發集團（00866）掛牌，後者主營煤炭業務，人氣雖未有霸王咁犀利，但正因如此，掛牌首日反可多加留意。
趁低吸納雨潤食品
「豬流感」已經成為一種普通流感，並沒有對經濟造成太大影響。上月阿莊亦推介過雨潤食品（01068），指「豬流感」非關食豬肉嘅問題，若疫情受控，圍繞雨潤嘅心理陰影會漸消，可以留意低吸機會。
由於阿莊準備隨時沽出中國忠旺（01333），故昨日先以每股平均價12.56元買入50,000股雨潤，相信在下半年豬肉價格回升，以及內需維持暢旺之下，將帶動雨潤股價向上突破。
重組展現規模效益
講開內需股，沉靜好一段時間嘅聯華超市（00980），終於打破悶局。今年一月，上海實業（00363）將聯華持股悉售予百聯集團。五月份，聯華委任百聯集團董事長馬新生為主席，華國平出任副主席（上周五華氏獲委任為公司總經理）。到咗上周五，公司宣布落實市場期待已久嘅動作，就係收購華聯超市。
據通告披露，聯華以總代價4.917億元（人民幣．下同），向百聯集團收購華聯超市全部股權。查實早喺幾年前，市場一直憧憬，聯華將與當時分屬姊妹公司嘅華聯重組合併。
根據資料顯示，截至去年底止，華聯嘅經審核資產淨值約為2.57億元，○七及○八年度之收入分別為22.7億元及29.58億元，而純利則分別為929萬元及3,282萬元。換言之，今次收購作價相等於○八年度市盈率約十五倍。
雖然相比起聯華○八年度營業額207億元，純利3.88億元，華聯嘅規模較細，但觀今次交易作價合理，加上二者合併後，可避免不必要嘅競爭，並有助鞏固聯華喺長三角嘅領導地位，無論喺銷售網絡和採購貨源方面，都可實現規模效益。
截至去年底止，聯華旗下大型綜合超市127家、超級市場1,788家、便利店1,957家，加盟經營店數目快速增長。是次收購與公司發展策略一致。
值得留意的是，聯華嘅毛利率較為平穩（去年毛利率微增0.56個百分點至13.55%），相信整合華聯後，將有助提升整體毛利率，配合銷售增長，盈利前景可以睇高一線。
昨日聯華股價一度升上13.2元，最終收市報12.98元，升11%，成交額1,734萬元。既然應該行嘅一步終於都踏出來，投行自然叫好，相信其估值尚有上調空間，可視此股為長三角的消費股首選，中線股價若成功突破14.5元，或將另有一番新景象。