本文重點
早幾日內地私募基金界嘅大紅人趙丹陽，終於一償心願，同「股神」巴菲特共進午餐，仲以「天價」211萬美元，先可以得到與股神食飯嘅機會，太子知道佢把握機會，不但與對方交流投資經驗，仲向對方推薦自己持有嘅物美（08277），股神效應果然強勁，呢個消息已令物美股價連升四日，趙丹陽帳面賺過億港元，「天價」午餐變咗「超值」午餐，真係抵！
連升四日 帳賺過億
「股神」慈善午宴一向被外界留意，自○五年開始，每年拍賣價有升無跌，直至喺○八年，趙丹陽以211萬美元獲得機會，創咗歷史新高價。據內地傳媒報道，佢係股神嘅忠實「粉絲」，堅信巴菲特價值投資理念，仲喺○二年成立「赤子之心」中國成長投資基金，係內地最早運用信託模式管理私募基金嘅人。