中央毫不吝嗇狂放水，無非係要在出口勁跌的情況下，圖以內需去抵銷影響，保唔保到八都好，至少年終GDP唔能夠離目標太遠。勢估唔到，零售銷售要到五月份先見到效果，反而股市樓市早半年已起步，上A累積升幅近七成六，樓市由春節前至今，升勢幾乎無停過。

內房股青蛙變王子

基於過去兩年囤積土地玩大咗，負債比率偏高幾乎係內房股特色。去年雷曼爆煲後，市場就不斷玩猜謎遊戲，估吓邊家內地發展商會最先因財困關門大吉，個別內房股債券形同垃圾，息率去到35至110厘一樣無人問津。當然，今日水浸加上樓市V形反彈，這類一年翻本債券已成歷史，加上政府對延遲發展土地強制收回的機制彈性處理，內房股唔使賤賣物業，即時由籮底橙變番基金至愛。

睇番幾隻一線內房股，中國海外（00688）○九年的預期市帳率係3.8倍、富力（02777）2.96倍、華潤置地（01109）2.2倍、世茂（00813）2.1倍，估值顯示股市對樓價長升充滿信心。可是，中央不願見到樓價升勢過急，過去兩年有目共睹，對傾向相信下半年樓市會變得有量無價的筆者來說，以上內房股實在有點揀唔落手。

芸芸內房股中，上海復地（02337）或許是炒落後之選，五月開始股價已在2.5元水平橫行，無跟內房升勢，去年業績係差，純利大跌八成七，只賺1.02億元（人民幣．下同），但筆者相信衡量地產發展股價值，資產重要於一兩年的業績表現，公司去年底每股資產淨值2.1元，以現價2.42港元計，市帳率只係一倍左右，相對上述幾隻名牌股，平一大截。

上海樓市價量齊升

不過，世界上唔會有咁大隻蛤乸隨街跳，平必有其平之原因，基金經理或許會嫌復地不及中海、富力，擁有全國性品牌，發展項目高度集中上海，再者市值奀，得61億元，對於胃口大的基金，未必是他們杯茶。只不過，上海樓市今年有價有量，表現唔錯，三月樓市仲未十分癲時，公司已訂全年銷售目標62.5萬平方米，比去年多三成九，綜合內在及外在條件，炒落後股，買復地贏面應該幾高。