展望下半年，一個清晰不過嘅訊息係，美國經濟已經回穩，但經濟復甦長路漫漫；至於內地，出口市場復甦進度並非掌握喺自己手中，故中央要實現「保八」，就必須要繼續維穩股市和樓市，推動內需，故可以預期，年底前，適度寬鬆嘅貨幣政策將會維持不變。
上周五，見到唔少細價股又有異動。經驗告訴阿莊，凡升市調整，細價股表現往往可以預示後市方向。若短期細價股真係再度活躍起來，則恒指向上突破嘅機會增加，故不建議喺現水平開淡倉，穩陣起見，小注怡情便可，別過早抽身離場。
上周五，阿莊手持中國忠旺（01333）終於突破10元關，高見10.52元，收報10.4元，升0.86元。睇嚟大家都押注於未來一、兩周嘅新股上市潮，半新股坐享其成，若升得太「狂野」，阿莊會留意食胡機會。講起新股，明日掛牌嘅361度（01361），論質素，喺同類股之中，未見太過突出，故若入飛認購「中獎」者，別錯失攞獎金嘅機會！
波羅的海指數回升
今年以來，反映運費表現嘅波羅的海乾貨指數顯著上揚，但航運股表現並未作全面反映。今年上半年，歐美進口商已消化大量庫存，只要下半年消費市場有改善，出口復甦只係時間問題。只要閣下確信環球經濟最壞時刻已過，對航運股嘅前景展望，實毋須過於悲觀。
受到運費及運載量下降嘅影響，今年首季，中海集運（02866）業績由盈轉虧，蝕12億元人民幣，加上大戶減持，致使今年以來股價表現跑輸大市。阿莊相信，其股價表現某程度已反映今年業績可能「見紅」嘅因素。隨着管理層因應情況調整策略，加大內貿業務，以抵銷外貿不景嘅影響，相信下半年會逐步見到成效，現價估值仍屬低迷，值博率不能完全抹殺。
上周五，恒指升325點，收報18,600點，中海集運股價亦隨大市上揚，收報2.1元，升8.8%，成交大增至6.68億元。看來，此股自本月初以來嘅調整經已完成，若本周能確認重上2.2元水平，後市有望向2.6至2.7元水平推進，穿1.9元止蝕。