呢個月，阿莊亦有落場睇樓，發覺市區二手樓市旺到七彩，交吉盤愈來愈少，銀行估價未能跟到市價。呢種情況，真係近年少見。不過，今年以來，香港經濟唔見得有幾好，特別係出口市場仍未見有大起色。即使係炒復甦預期，亦唔見得樓價有條件咁快可以上番舊年高位。

低息環境利好樓市

事實上，次季樓價升勢，令唔少行內人跌眼鏡。歸根究底，低息環境趕銀行存款客入市，加上今年以來股市觸底回揚，獲利資金流入樓市。另外，今年上半年內地新增貸款可觀，部分流入香港樓市。凡此種種，皆是造成樓價與經濟實質表現背道而馳嘅原因。阿莊預期，租金與樓價嘅走勢背馳將愈來愈明顯，因為低息環境下，買樓收租點都好過放喺銀行，100萬元存款一年收得十蚊利息，何況港人亦深明，揸「磚頭」可以抗通脹嘅道理。

展望未來一年，利息將持續低企，樓市供應唔會大增，內地維持寬鬆嘅銀根，這些因素將支持樓價繼續高企，手持大量土地儲備嘅本地發展商，如新地（00016）、信置（00083）、長實（00001）都會係受益者。

廈門港現買貨良機

本周初阿莊提及嘅廈門港務（03378），受發盈警之累，昨日股價一度低見1.46元，阿莊趁機下首注，喺1.47元買入20萬股，事關上半年港口業務不景係通行都面對嘅問題，即係話盈警來得唔意外。反之，「海西區」嘅確立，已提升廈港嘅戰略地位，故可視壞消息為上車機會，而昨日該股跌幅僅3%，亦反映投資者惜貨。

本月初，內地銀監會發出「特急」通知，要求銀行加強信貸處理，防止資金違規入市。近日，又傳來國家審計署查出去年內銀違規貸款逾300億元人民幣。不過，這些消息都未有影響內銀股嘅升勢，昨日六行升幅介乎1.2至3.7%。

近日多家大行排隊發報告唱好內銀股，可見大戶煲起內銀股有迹可尋。若順勢作短線投機，阿莊會揀建行（00939），事關策略股東售股套現一事已告一段落，近月股價升勢讓投資者重建信心，加上央行一再強調，下半年將繼續落實適度寬鬆嘅貨幣政策，而建行比較多做基建融資，貸款組合質素相對較高，着眼於盈利前景及控制不良貸款風險，建行都係首選之列。睇走勢，短期若企穩喺6元之上，目標可上移到6.8至7元，調整宜守5.45元。