據人民銀行資料顯示，今年五月份內地銀行體系嘅外匯佔款明顯上升，淨結匯量達到年內的新高。有指海外資金更開始重流內地市場，最近有消息指，內地有關部門正研究取消樓市「限外令」。究竟外資到底是否聞風先動，率先調配資金重流內地市場，相信於今年第三季，將會逐步明朗化。
能源汽車獲國策扶持
今年上半年，內地汽車股喺國策扶持之下，股價表現亮麗，唔少股壇專家都大嘆走寶。最近，領導人喺北京就新能源汽車發展進行專題調研時亦再次強調，將大力實施新能源汽車戰略，加大投入和支持力度，建議業界積極聯合上下游企業，完善產業鏈，以盡快形成規模化生產能力和網絡化嘅售後服務。在當今中資汽車股之中，僅比亞迪（01211）喺拓展電動車方面進展較大，股神巴菲特揀股票，確係有一手。
最近阿莊留意到一則內地報道，內容指中石油集團將喺廣州南沙區黃閣小虎島建設華南最大成品油庫和油品集散地，計劃今年底前落成投資，預計總油庫容量76萬立方米。
講起小虎島，又令阿莊想起漢思能源（00554）。漢思擁有目前華南地區最大嘅綜合性石化產品公共保稅倉——小虎石化庫，正正位處小虎島，佔地21萬平方米，總庫容量33萬立方米，由旗下附屬公司——粵海（番禺）石油化工儲運開發負責運營。
目前，穩佔廣東成品油市場逾六成分額嘅中石化（00386），乃小虎石化庫嘅大客，雙方簽訂了為期二十年嘅成品油儲庫租用協議。若然中油集團真係落實喺小虎島搞大型石化庫，好明顯將同中石化競爭。
不過，漢思嘅項目已經展開營運，而位於小虎島，佔地3.5萬平方米嘅固體化學品倉庫流中心亦會喺今年完工，先喝「頭啖湯」，而區內再有大孖沙進駐，反可提升該區嘅戰略地位，有競爭未必係壞事。
此外，漢思亦喺東莞設有東州石化庫，規模係小虎石化庫嘅三倍以上，首期工程料於今年底完成，而台山石化庫項目則仍有待落實投資詳情。
基本上，呢隻唔起眼嘅股仔，搞起內地石化庫項目，真係有板有眼，去年純利逾5,000萬元，去年底手持逾兩億元現金。管理層早前透露，正尋求與環渤海地區同業合作嘅機會，能唔能夠開花結果，就要拭目以待。
股東背景佔優勢
阿莊仲記得，前年中東政府投資基金迪拜投資，按每股1.1元入股漢思，可見喺石油國投資基金眼中，漢思係一家在行而又有潛質嘅公司。以昨日收市價計，漢思嘅市值為15億元，以其業務性質而言，市值唔算大。若能善用手持財政資源及股東背景，加快落實新投資項目，應有助擴大市值。
再看股價走勢，次季以來反覆向上，升抵0.45元始作調整，昨日收報0.39元。照計喺0.3元水平有得諗，但限於交投唔算活躍，要有心理準備跟中東股東一起耐心持貨。