尋日大市顯著回調，恒指跌逾500點。事實上，近日大市唔上唔落，唔少股份都開始散散哋，細價股尤甚，但慶幸的是，尋日尾段見買盤頗為積極，市場中似乎有一班人並非看得太淡。點都好啦，現階段只適宜跟炒消息股，而且最緊要係見好即收，有胡就要食。
講開消息，尋日除咗政協主席賈慶林強調，要大力推動新能源汽車跨越式發展，值得大家憧憬之外，工信部及發改委發通知，表示同意3G視像通話服務可實行市場調節價，講得白啲，即係電訊營運商以後可自行調整視像通話的收費，消息對內地電訊商往後經營可謂一大喜訊，值得慶祝。
至於個股方面，真係不得不提一下，已停牌達七個多月的國美電器（00493），昨日復牌，並且宣布引入實力策略股東，消息刺激股價上漲，惜後勁不繼，只能挨近全日低位收市。雖然話就話有策略股東執手尾，但係根據港交所（00388）資料顯示，前主席黃光裕仍手持35.55%國美股權，未來呢批股份去向如何，對國美股價始終係一個不明朗因素，前景未盡樂觀下，短期追入似乎唔太值博喇。