太子問安踏執行董事賴世賢，點解可以擊敗其他國際品牌體育公司，好似Adidas、Nike同李寧（02331）等？佢話因為公司投放好多資源支持奧委會賽事，又符合奧委會開出嘅條件，所以成功爭取到呢個項目。佢仲話，日後有11項國際賽事好似冬季奧運會、亞洲室內運動會等，都會見到中國國家代表隊穿着安踏運動裝進場。

李寧嫌回報唔理想

太子記得李寧依家贊助六支中國國家體育隊，喺舊年奧運會仲好突出，令到好多人認識李寧品牌，點解今次輸咗？聽朋友講，今次李寧都有入標，但有見呢個項目嘅投資回報唔理想，所以放棄。不過，佢哋仍然會贊助國家代表隊嘅運動衫。

另外，安踏執行董事賴世賢話，今年第一季同店銷售增長有單位數字，對於第二季同店銷售增長樂觀。公司第四季定單增25%，反映內地體育用品市場回暖。