反觀港股，一如近日悶熱嘅天氣一樣，觀望氣氛繼續濃厚，恒指再次失守萬八點關，收報17,776點，跌307點，大市成交金額降至只有639億元。新股集資活動以及市場觀望下周聯儲局的議息結果，唔多唔少亦影響咗現貨嘅交投，幸好有中資股撐住半邊天，不至於要為選股而煩惱。

本周阿莊買入嘅光大控股（00165），昨日曾高見19.02元，收報18.96元，升3.72%。另手持嘅半新股中國忠旺（01333）亦再度發力，高位曾見9.3元，收報9.1元，乃掛牌以來新高。瑞銀剛就忠旺發表報告，建議「買入」，目標價13.45元，可以作為參考。

受惠多項優惠政策

內地上月已傳出，電力改革措施即將推出，月底前或有進展。昨日電力股逆市報升，中國電力（02380）升6.25%、華潤電力（00836）升4.8%、大唐發電（00991）升2.35%、華電國際（01071）升2.5%，華能國際（00902）算係較為落後，微升0.94%，話唔定遲來先上岸。

講開電力股，阿莊又想起從事電力設備、通用機械、數控機床及商用車輛零部件嘅重慶機電（02722）。此股乃中央十大產業振興措施嘅受益者，加上西部大開發，以及國務院關於推進重慶市統籌城鄉改革和發展等優惠政策嘅支持下，今年二月起，旗下各項業務已出現復甦勢頭。

據重機披露，截至今年二月底止，主要業務嘅定單已達到今年預定生產目標嘅六成以上，特別係柴油發動機、工業泵、水力發電機組和高壓變壓器。此外，包括鋼、銅等原材料價格持續低企，有助降低成本壓力，全年毛利率可望穩中有升。

今年以來，中央政府針對汽車業作出一系列措施，目的只有一個，就係確保這個重要產業平穩發展，避免供求出現嚴重失衡，拖垮經濟。故見今年以來，汽車銷量較市場預期為佳，亦帶挈周邊嘅零部件行業，重機嘅商用車零部件及數控機床業務，復甦進度均較預期為快。

加強車輛零部件業務

今年二月，重機斥資增持綦江齒輪及綦江鍛造，前者變成全資附屬，後者持股量增至52%，此舉將有助加強發展商用車輛零部件業務嘅自主性和競爭力。

除咗進行策略性收購之外，其實重機話要為旗下機床業務引入策略股東，經已講咗大半年，若然管理層真係有心做嘢，相信年內會有進展。

上周，重機嘅主要股東重慶國際喺場內減持重機三球多股份，翻查資料，當日重機成交急增至1.19億股，而之後幾日股價亦企穩喺1.3至1.4元水平，似乎有大戶積極收集貨源，話唔定真係有好消息跟尾。睇走勢，若然股價能以大成交突破1.5元水平，將確認進入新升浪，調整宜守穩1.2元。