游資繼續輪流炒作不同板塊，昨日又輪到汽車股，東風汽車（00489）由全日低位5.59元，升至全日高位見6.78元，收市報6.57元，升10.98%，成交3.86億元。受一汽正與華晨（01114）母公司謀合併嘅消息刺激，華晨亦急升13.98%，收報1.06元。阿莊認為，短線睇勢跟炒，未嘗不可，但最好係炒即日鮮，輸贏都即日計數，否則好似隻旭光（00067），前日尾市掃到甩轆，但昨日卻以接近全日低位收市，真係走遲半步都唔得！
正在外訪嘅國家主席胡錦濤表示，國際金融危機對中國經濟嘅不利影響繼續顯現，但中國將採取各項措施，爭取率先從危機中復甦。副總理李克強則重申，要繼續實施積極嘅財政政策和適度寬鬆嘅貨幣政策，全面落實一籃子計劃，確保經濟穩快發展。從領導人嘅發言可見，下半年中央政府救市嘅力度，只會增、不會減，這對A股市場提供有力嘅支持。只要A股走穩，外資要做淡港股，便有所顧忌。
手機商享3G成果
內地三大電訊商已於今年陸續展開3G業務攻勢，基本上，有關3G嘅基站等基建設施，經已做得七七八八，嚟緊3G產業嘅受益群，會由專營大型電訊設備行業，轉移至手機製造及增值服務供應商。
久違了嘅TCL通訊（02618），近年積極重組旗下阿爾卡特（Alcatel）和TCL品牌，優化產業結構，去年度連續三年業績轉盈。不過，受到去年下半年金融海嘯嘅影響，全球手機需求顯著下降，集團去年末季業績倒退，今年首季更錄得逾5,000萬元虧損。
事實上，海外市場復甦需時，急也急不來。故未來兩年，公司能否再一個財政年度實現利潤，便要寄望內地市場。一般預期，喺三大電訊商啟動3G業務，加上手機產品被納入「家電下鄉」範疇下，將刺激首次購買手機嘅消費需求上升，從而帶動手機需求增長。從公司今年首季業績可見，海外市場嘅手機及配件銷售量同比下降43%，但內地市場卻急增84%，可見後者才是公司嘅主要戰場。
阿莊估計，今年上半年TCL通訊將完成清理現有庫存，下半年陸續推出新型號手機，屆時策略將會由「以量取勝」改為「以價取勝」，即由中低端產品，轉移至毛利較高嘅中高端產品。這個策略轉變，對於構建長遠盈利增長基礎，有重要意義。
完成回購換股債
上月，TCL通訊完成回購所有換股債，消除了一項可影響業績嘅不確定因素。若次季業績仍然困難，阿莊唔會感到意外，但睇整體格局，公司正朝着轉盈嘅方向發展，內地市場潛力未盡發揮，而隨着環球金融市場回穩，海外市場銷售亦有改善空間。
綜合而言，此股「危中有機」，若想「燒冷灶」，嚟緊公布中期業績前後，可以留意執平貨嘅機會。