廣東人鍾意數目字「8」，因為佢諧音係發達個「發」，相信一般人都希望發達唔使做，最近創業板股份弘海（08112）轉做主板股份，有咁多冧巴揀，但佢哋偏偏揀咗個「65」，一反傳統無揀到「8」字冧巴，點解佢哋咁與眾不同呢？
管理層生於60年代
聽老友講，其實弘海一班管理層，可以揀嘅冧巴相當多，當中不乏「發」字靚號碼，但係去到最後階段，佢哋手上揸咗三個冧巴，三個都無「8」字，包括「65」、「72」同埋「90」。最終揀咗「65」，原因係一眾管理層都生於六十年代，對「6」字有情意結，認真懷舊。
另一原因係「65」過往記錄良好，「65」上手係盈科保險，當年被富通收購之後，繼而進行私有化。