阿莊喺五月廿九日買入嘅忠旺（01333），雖頻頻有大戶減持，但股價卻一連突破8元及9元關，反映好淡角力過後，好友佔優，唔排除呢轉唔見10元不罷休。而上周初買入嘅中保（00966），股價喺15至16元水平反覆，會繼續持有。

內地樓市重現生機

今年首季，阿莊對於內房股嘅睇法仍偏向負面，事關認為中央不會讓樓價急升，加上經濟唔好，發展商去貨慢，資金周轉仍然困難。但如今看來，雖然中央不想見到樓價急升，但大前提係要樓市穩定健康發展，故今年以來推出各項措施緩解房企信貸壓力，又鼓勵用家購房，加上各項刺激經濟嘅措施逐步見到成效，居民對置業回復信心，次季以來內地樓市如「大地回春」，重現生機。

故此，近期見唔少大行對內房股基本因素嘅評價有所改善，資金重新入場，唔少大型內房股嘅股價已升近五十二周高位，升勢之快當真始料不及。而隨着下半年經濟加快復甦，內房行業確有機會喺年內見底回揚。

喺大型內房股之中，阿莊認為中國海外（00688）、雅居樂（03383）都係優質之選，若要揀細價當炒二、三線股，則可留意走勢正醞釀突破嘅沿海家園（01124）。

沿海主營物業發展及投資，項目遍及北京、大連、江西、瀋陽及武漢等地。負債較高，係此股嘅主要風險因素之一，上月更有評級公司調低該股嘅債券評級。不過，最近內地調低商品住宅資本金比率，對於這類債務壓力較重嘅內房企業，幫助可能會較大。

最近沿海獲主要股東入場增持，究竟公司是否醞釀新動作，就要拭目以待。集團股價自五月中旬急升過後，一直喺0.7元水平徘徊，而整固期間交投縮減，反映沽壓不大。站喺炒作嘅角度，短期再開車嘅可能性甚高，若成功突破，目標1元，0.68元止蝕。