話說佢幫中行呢啲超級大型國有銀行呻苦，話要啲大銀行去谷中小企貸款真係好為難㗎，因為成本同做一單大型企業嘅生意一樣。佢直腸直肚咁舉例批評，內地好似溫州呢啲中小企密集嘅地方，竟用「三表三品」去決定做唔做一單中小企貸款生意，真係太粗糙。

與劉明康唱對台

梁大律師解釋，所謂「三表」係指電表、水表、報關表，「三品」係指老細嘅人品、產品同埋抵押品。太子醒起兩個月前已經聽過呢嗰咁有中國特色嘅潮語喇，咪就係劉明康最近考察某地方銀行時，見到有銀行用呢啲做指標，就公開盛讚、推介一番囉。

內地依家仲未有可靠嘅中小企信用資料庫，惟有暫時用住呢啲咁原始嘅方法，梁律師都係想提點內地銀行早啲用現代化嘅方法做生意啫。