據悉，彈性返工時間即係只要員工返足每日鐘數，返工同放工時間就自己決定，至於喺屋企返工，顧名思義就係連公司都唔使返，喺屋企搞掂晒啲嘢就得。不過，就限住一個星期最多兩日。至於恒生員工，喺大時大節返工時間都會比較彈性，可以早啲返屋企做節，做夠一定鐘數義工仲可以放多日假添。

獎勵做義工職員

太子相信滙豐今次推行新政，真係信心十足，因為佢哋員工做義工都做唔少，偷懶機會一定唔大。

根據統計，滙豐搞咗好多年嘅「學生營商體驗計劃」，佢哋嘅義工時數已經超過2.7萬小時。

滙豐銀行亞太區主席鄭海泉同滙豐銀行執行董事王冬勝，仲親自頒發長期服務獎畀營商計劃老臣子。有員工已經做咗五年義工，呢個「老人獎」真係當之無愧。