國家發改委日前宣布提高成品油價格，消息在市場預期之內。查實，雖然國際油價升至每桶60多美元，但價格尚未及高峰期嘅一半，再加上美元貶值，油價實際嘅反彈幅度，未必如想像般大。
但對於油企而言，產品提價當然是好事，就如中石油（00857）高層預期，喺呢次提價過後，公司每月將增收12億元人民幣，一年講緊多收百億元人民幣，難怪股價反覆向上，相信半年結前，股價有力挑戰10元大關。
由於股價累升已多，故FMR亦趁高作出減持，故現階段宜先行觀望，不宜急於買入。
大市整固，細價股發圍。阿莊認為，即市順勢炒作未嘗不可，但喺在揀股方面，就宜側重有成交嘅細價股之上，事關呢類股份之中，有幾多係虛，有幾多係實，大家心裏有數。
資金重投新能源股
人頭湧湧，擠上順風車，見唔對路都有得走，但玩着嗰啲交投不足嘅股仔，隨時停車熄匙，便逃生無門。好似前日股價升逾一成嘅元昇（00925），昨日成交卻急降至只有89.4萬股，想落車都唔容易。
講到股仔，昨日游資又再翻炒再生能源板塊，陽光能源（00757）一度衝上3.38元，收市報3.18元，升9.28%；中國風電（00182）亦長炒長有，昨日收報0.94元，升8%；中傳動（00658）昨日一度叩17元關，惟高位獲利回吐較大，收報15.72元，倒跌5%。
繼續以板塊角度出發，六月份阿莊建議重點關注醫改板塊，事關內地消息稱，包括基本藥物和公立醫院改革在內嘅第一批新醫改配套方案，將於月內公布，藥業股橫行咗一個月後，隨時又再成市場焦點。
除了阿莊手持嘅中國製藥（01093）之外，今日又想講講隻廣州藥業（00874）。廣藥主要從事製銷中成藥、銷售及進出口中西藥及醫療器材，以及研發天然藥物及生物醫藥，其中以製銷中成藥為主要收益來源。
藥品銷售受惠增長
根據新醫改方案，喺○九至一一年，全國各地將投入8,500億元人民幣以保障五項基本改革，隨着政府喺醫療保障嘅固定支出逐年加大，勢必拉動藥品消費增長。站喺呢個角度，廣藥應該受益不淺。
另外，新醫改將令內地醫藥市場擴容，現代中藥和生物醫藥行業將加快發展。受惠於廣東省及廣州市對中醫藥行業發展嘅高度重視，相信未來出台有利產業發展嘅各種優惠政策，廣藥亦會受惠，而藥品銷售量嘅增長，應足以抵銷藥品售價下跌嘅影響。
今年首季，廣藥按中國會計準則計之純利為3,779萬元人民幣，按年倒退66%，主要係期內投資收益急降72%至2,500萬元。未來，公司將因應市場變化，擴大向終端醫院銷售嘅渠道，雖然呢啲都需要時間才見到成效，但策略意義深遠。
觀其股價走勢，短期阻力位喺3.3至3.5元，若月內成功藉產業消息作出突破，目標放喺4元，穿2.9元止蝕。