歐冠盃終於曲終人散，認識一位賓架界超級球迷，年年都會透過「黃牛」到現場觀戰，由他的留言，令史提芬對金融海嘯後遺症又多了半分了解。去年喺俄羅斯舉行嘅決賽，當時次按風暴未全面爆發，全球經濟及股市仲唔錯，一紙門票閒閒地炒到七八萬港銀，若非預早出手，更是一票難求。但時移世易，據知今年歐洲黃牛黨炒燶者眾，決賽當日搵飛唔難不特止，即使靚位門票，亦只需去年一兩成價錢就搞得掂。
親赴歐洲睇波嘅食宿機票，當然並非史提芬及普羅大眾花費，但可見股市雖然反覆回升唔少，但歐洲有銀士荷包仲係元氣未復，高檔次消費看來未有耐可以復原。
港「軟件」勝上海
中央點名在二○二○年前將上海打造成國際金融中心，不少香港人擔心，香港身為「中國紐倫港」嘅地位遲早不保，但近期遇到一個內房公司老闆，佢卻掉頭唱好香港，認為香港無論係會計準則、企業法治，以至上市程序都比內地專業及規範化，認為上海要在「軟件」發展上超越香港，並唔容易。筆者同意他的睇法，並認為更重要的是，人民幣除非能自由兌換，否則外資選擇在香港或中國A股市場上，買同一間上市公司股票時，選擇肯定是前者，始終外資要在內地以外匯購買股票，仍然是限制多多，還未計因為流通量不足，而經常出現高昂溢價的問題。
金融中心唔嫌多
未來十一年內，人民幣會否成為全球重要儲備貨幣，能夠自由兌換，筆者沒有水晶球，但以3億多人口的美國經驗，深信13億人口的中國，即使建立多於一個金融中心，以至兩三個股票交易所也不為過，何況在一國兩制、不同的法治及金融系統下，港交所（00388）的獨特地位，在可見日子內所受的衝擊，恐怕不如公眾想像般大。
現時港交所市值是1,270億元，而過去三年的利潤則分別是25.2億元、61.7億元及51.3億元。大部分投資者都了解，港交所的收入與大市成交額高低有非常直接關係。近期香港銀行體系結餘去到破記錄的2,000多億元，刺激港股交投遞增，短期而言，這情況利好港交所的交易中介收入。
從長遠看，交易所的收入與上市公司數目及規模，以至通脹更是息息相關。恐怕沒有太多人記得，廿年前港股的日均成交不過是25億至30億元，今日大量中資巨無霸在港上市，吸引各方資金在港交易，未來隨着這些公司的盈利及市值規模膨脹，港交所亦自然會係得益者。