北韓試射核武，且威脅南韓動武，但股市對於呢類負面消息無大反應，此可視為市底偏強嘅又一佐證。地緣政治風險增加，國際油價創六個月新高，石油股可以關注。前日中石油（00857）股價有異動，收報8.71元，升5.8%，成交增至17.95億元，短線有勢向10元關推進，不妨留意相關嘅認購證或牛證。
前日深圳市政府宣布，《深圳市綜合配套改革總體方案》已於本月初獲得國務院批准，標誌該市推行改革開放進入新嘅階段。理論上，若今年深圳市落實取消一市兩法，即撤銷二線關，深圳特區嘅總面積將由目前嘅395平方公里擴容至1,948平方公里，深圳特區嘅土地供應變相大幅增加。究竟深圳樓市會如何消化呢個消息，尚有待觀察。
至於深圳加快推行企業改革及推動金融業發展，長遠而言當然係正面，相信其中首個大Project，乃於年內推出嘅創業板。
呢期股市暢旺，唔少二、三線股藉機進行集資活動，就如信義玻璃（00868）配售新股兼舊股，包括大股東嘅賣方套現4億多元，公司則集資5億多元。老實講，自去年末季全球信貸緊縮，企業融資並唔容易，難得如今股市資金充裕，投資者對經濟前景睇法有改善，企業把握機會配股集資，部署增產以捕捉經濟復甦嘅機遇，策略可取。
唔經唔覺，國企指數已升上10,000點樓上。針對國企股，阿莊始終認為，今轉升浪之中，中國人壽（02628）及中國平安（02318）嘅表現相對落後。若然短期國指企穩喺10,000點樓上，呢兩隻內地保險股隨時爆升，可以多加注意。
收購民安增協同效益
講開內地保險股，中保國際（00966）宣布收購民安保險（01389）後，股價一直喺13至14元水平上落。由於預期今次交易帶來「一加一大於二」的效益，成就雙贏局面，可以考慮跟進中保。
是次中保向民安提全購，其後會提出將民安私有化。若一切順利，預計年底前完成。今次交易以換股形式進行，站喺民安股東的角度，民安的股份流動性較低，以合理價換取流通性較高的中保股份，有利冇害。而站喺中保股東的角度，查實中保同民安分屬姊妹公司，今次交易，可理順兩者關係，另由於民安資產財務狀況強勁，有助改善中保的財務狀況，而併入民安在港的產險業務後，將令中保的財險業務覆蓋版圖擴大，直接提升盈利能力，而經整合壽險、財險及再保險業務後，各項業務之間的協同效益亦堪憧憬，有助拉近與競爭對手的距離。
內地保監會早前批覆中保（控股）變更為「中國太平保險集團公司」，相信在完成購併民安後，中保亦會與母公司的名字統一，以凸顯品牌優勢。雖然，中保喺完成今次大動作後，或者至少需要一年半載時間進行業務整合，才能彰顯出規模效益，但反正大方向更有利於公司的長遠發展，睇好兩地保險行業前景，呢啲位落場買中保，有買貴但唔會買錯。