本文重點
近日股市同天氣一樣，灰蒙蒙一片，能見度十分低。三月至今，港股由11,344點起步，未夠三個月反彈超過6,000點，而過去十多年，歷史上港股在17,000至18,000點之間是屢受考驗。九七年股市高位在16,820點，二千年科網熱潮也終結於18,397點，今次港股又嚟到傳統心理關口，要更進一步，睇怕需要更多利好消息加以配合。
期指結算前夕，港股陰陰乾，但地產股表現一枝獨秀，摩通加入唱好磚頭行列，預測香港失業率第二季在6.1%水平見頂、經濟好轉下，今、明兩年本地樓價仲有10%及5%的進帳，長實（00001）、信置（00083）、新地（00016）、新世界（00017）、太古A（00019）、恒地（00012）及恒隆地產（00101）因而齊齊被掃高。
對於近期樓市走勢與經濟表現背馳，朋友中對此有兩極嘅睇法，一方認為銀行息口太低，變相鼓勵買樓收租，另一方卻認為樓市高處不勝寒，尤其失業率未見頂，長息亦正回升，低息期未可久享；到底誰是誰非？兩面都有道理，但平心而論，今日業主供樓負擔佔家庭收入比例仲係幾低，大約只係30至35%左右，同九十年代閒閒地七八九成比較，唔算過分，至少今日無聽過有人好似九七樓災前咁，要搵兩份工去供樓。
近期，內地一些工業股翹楚，特別受大孖沙歡迎，一來內地薪酬及原材料成本有紓緩迹象，歐美大企業為着縮皮增加外判生產，都令內地工業股被睇高一線，巨騰（03336）及比亞迪（01211）兩隻愛股就剛剛創出新高。
估值低啱熱錢口胃
生產可充電池嘅飛毛腿（01399），今年股價輾轉由0.6元升到尋日1.21元，剛好翻咗一番，論市值得12.5億元，只及比亞迪的五十五分之一。當然，兩者在銷售規模上相差甚遠，大行預測飛毛腿○九年銷售額16.3億元（人民幣．下同），比亞迪卻是343億元！過去兩年飛毛腿業績分別是獲利1,550萬元及1.31億元，差距大主要是前年遭逢火災，造成廠房及存貨損失所致。雖然，論規模效益或者與國際品牌嘅關係，主攻本身品牌的飛毛腿，或許及不上比亞迪，但水向低流，近期投資者四圍搵低估值股票博短線，飛毛腿預期市盈率僅8.2倍，即使唔同股神睇中嘅比亞迪直接比較，單是以普通工業股看待，亦頗值博。