以阿莊嘅經驗，呢種市況，唔會維持好耐，究竟後市爆升定爆落，阿莊都係十五、十六，事關今次升市全由政策及資金主導，唔可以完全以基本因素分析。
站喺投資者嘅角度，呢兩個月升市，只要肯落場，唔難贏錢，但由於大價股累計升幅甚巨，指數停滯不前下，部分從大價股流出嘅資金，轉炒二、三線股搵快錢。但股仔股價動輒升幾成，加上係用「利錢」（即利潤）入市，投資者容易作出加注決定，結果揸到一手股仔都唔多覺。故阿莊喺度提醒各位，宜審慎控制風險，免得貪勝不知輸！
內地傳媒報道，國家電網提出建設智能電網嘅目標，而國務院亦都重申，中國將從實際出發，積極探討符合中國國情嘅智能電網發展道路。
呢個消息，令市場憧憬內地正就一個重大新興產業制訂規劃，刺激電力設備股股價飆升，如東北電氣（00042）股價昨日就一度湧上1.6元，收報1.42元，升20%；成都普天電纜（01202）亦上升19%，收報1.37元；威勝集團（03393）則升24.5%，收報4.98元。
游資充斥亂炒一通
但老實講，呢類政策，仍處構思階段，距離實際執行，長路漫漫，最終電力設備股受惠程度有多大，目前又實在言之過早。所以話，見到呢類股份急升，只能講市場游資真係太多，乜都炒得一餐！
今年以來，新股之王要算係遼寧首富旗下嘅中國忠旺（01333），公司喺本月初掛牌，當時以招股價下限水平每股7元定價，集資逾90億元。
由於招股期間受「豬流感」（H1N1甲型流感）疫情消息影響，致使公開發售部分認購不足，但國際配售反應則不俗，反映散戶投資者與機構投資者取向不盡相同。
事實上，忠旺上市後股價跌穿招股價，以短炒為主嘅散戶，亦可算冇睇錯。不過，從另一角度睇，忠旺大部分貨源已集中喺機構投資者手中，相信經過一輪收集期後，股價挾上只係時間問題。
再睇睇忠旺嘅業務，公司主要從事研發及產銷多元化優質工業鋁型材產品，其中特別專注內地交通運輸領域，食正嚟緊幾年內地全國運輸網絡大興土木嘅商機。
未來生意唔憂做
目前，中國南車（01766）同中國北車，都係忠旺嘅策略夥伴，公司手頭定單超過40萬噸鋁材，未來會集中拓展高端產品，包括拓展深加工業務，亦不排除會進行購併活動，展望消息流趨於正面。
由於忠旺主營內地市場，加上政府針對大型公共基建大灑金錢，而公司又集中經營交通運輸領域，受樓市不振嘅影響不大，增長前景有保證，公司目標係將年產能由目前嘅53萬噸，提升至二○一一年達80萬噸，這將進一步鞏固其龍頭地位。
呢期大市炒股炒得愈來愈「濫」，與其冒險買啲唔知做緊咩嘅股仔，又或係業績差劣嘅小型國企股，倒不如買進呢隻實力新股，博其股價喺7元樓下收集近月，收乾貨源後才見真章。照計呢類股一係唔行，一行就一、兩蚊，止蝕位可定喺6蚊。
順帶一提，持倉中嘅北京控股（00392）昨日派息除淨，股息收入約4,500元。