○三年嘅沙士同家陣嘅豬流感（H1N1甲型流感）都令港人膽戰心驚，但更令人覺得邪嘅係，沙士同豬流感嘅香港首宗個案都同中旅國際（00308）有莫大嘅淵源，事關兩次都係發生喺中旅旗下嘅酒店，而早輪豬流感首宗發現個案喺中旅旗下灣仔維景酒店發現後，政府將間酒店內嘅住客同員工隔離咗七日，家陣事過境遷，酒店已經重開，中旅主席張學武話，佢哋不知幾開心。
發放補貼 免費旅遊
中旅執行董事許慕韓話，維景被隔離嘅員工有成百幾人，佢哋捱得好辛苦，所以酒店解封後，公司即刻發放咗幾十萬元嘅補貼畀員工，其中30位表現突出嘅員工仲額外有大利是添；公司仲畀咗額外假期同時請佢哋去旗下嘅旅遊景區旅行散心。
