本文重點
新世界發展（00017）執行董事鄭志剛尋日出席「新世界 眾力量」2009舊衣新貌布藝雕塑創作展開幕禮。呢個活動係由新世界發展聯同多個社會企業攜手舉辦，目的係鼓勵青少年進行藝術創作，將啲舊衫褲設計成得意可愛嘅布藝動物雕塑。活動提倡青年藝術之餘，仲向大眾宣揚環保嘅意識。
鼓勵創意 宣揚環保
太子傳媒老友報料話真係估唔到舊衫褲都可以轉化成咁靚的製成品。老友就好奇問吓鄭志剛平時有冇用啲舊衫褲做啲小設計，佢就話有時都會剪爛啲舊衫褲當枱布咁用，或者用嚟裝飾吓啲T恤。真係認真別出心裁！
老友仲問鄭志剛同未婚妻Jennifer選喺十一月結婚有乜特別意思，佢話自己都唔清楚點解會選擇十一月，可能係貪秋天夠涼爽咁話喎！
太子仲八到一段奇聞，有消息話新世界發展有意入股美國NBA球隊克里夫蘭騎士！當地嘅報道話，新世界集團出錢畀一名叫黃健華嘅人支持佢入股，佢仲有可能係下個賽季擔任球隊嘅管理層。新世界發展嘅發言人，已經否認有關嘅傳聞，話絕無此事。成件事真係匪夷所思！