其實，市場中人都有心理準備，熱錢會隨時流走，但究竟幾時開始？走嘅速度有幾快？就得個「估」字。炒家繼續喺股仔之中尋歡作樂，懶理指數高低，捉得正今日開邊瓣股份先至係最實際。就如繼上周汽車股及仙股起動過後，昨日又輪到「爆玻璃」──幾隻玻璃股齊齊「爆」升，中國玻璃（03300）中途停牌，停牌前報1.08元，升17.3%；信義玻璃（00868）收報6.15元，升8.8%；浙江玻璃（00739）報2.15元，升15.5%。
中保購民安締雙贏
中保國際（00966）向民安控股（01389）提全購建議，每十股民安換一股中保新股，收購價相等於民安每股1.3元，較停牌前價格高出44%，亦相等於去年底之經審核每股資產淨值約1.1倍。阿莊認為，交易作價合理，可成就雙贏局面，料完成今次交易後，中保的競爭能力將大大增強，股價在13至14元水平，中長線應該唔怕買。
雖然本地失業率仍有上升壓力，但無可否認，踏入次季以來，個別行業嘅情況比想像中好，就如股、樓二市成交均現價、量齊升，證券經紀及地產代理業受益不淺。
從呢個角度睇，從事本地證券及地產業務嘅股份，盈利預測及估值應有上調嘅空間，昨日本地地產股普遍上揚，新世界發展（00017）、新地（00016）、長實（00001）及恒地（00012）升幅介乎5.5至7.9%，而從事地產代理嘅美聯（01200）更升9.8%。然則，繼港交所（00388）重見「紅衫魚」價後，從事證券業務嘅英皇證券（00717）及大福證券（00665），都可以重點關注。
講開地產，最近港鐵（00066）推售鐵路上蓋物業發展項目，受惠近期樓市小陽春，相信反應唔錯，且看銷售成交如何。
除了鐵路上蓋物業發展項目收益之外，旗下本港鐵路客運業務收益穩定，雖然公司已表明今年不會調整票價，但未來票價看升多於看跌，加上載客量穩定，展望前景穩步向好。
內地乃港鐵近年積極拓展嘅新市場，事實上，港鐵喺鐵路興建及營運擁有多年經驗，加上具有特區政府作為股東嘅背景，喺內地嘅發展，可謂前程錦繡。
內地發展尚未反映
去年末季以來，港鐵先後就瀋陽地鐵一、二號線項目簽訂特許運營承包協議，就北京地鐵大興線嘅營運及維修項目簽訂諒解備忘錄，另就深圳市軌道交通四號線項目簽訂特許經營協議，相信未來類似嘅項目仍會陸續有來。
港鐵在港嘅業務持續提供可觀嘅現金流，而內地則提供更多機會，讓公司善用現金流及資本，提升回報率，並確保長遠增長前景，策略可取。
阿莊始終認為，以目前港鐵的估值，並未充分反映內地因素。再看其股價走勢，五月上旬確認突破20元關後，未見有太大回吐壓力，股價企穩喺21元水平。經驗告訴阿莊，港鐵推售樓盤期間，股價應可視為安全期，加上近期地產股股價向好，港鐵股價大可炒落後，目標向23至25元推進，穿19元止蝕。