自踏入三月以來，恒指反反覆覆經已升咗近6,000點，當中犧牲的熊仔熊女不計其數。呢幾日就睇到網上就有一班淡友，眼見恒指愈升愈有，因而聲言要集結起來與大行一戰。呢班網友表示，在二○○八年金融海嘯一役中，希望投資者記得的不單只是貝爾斯登，仲有呢班曾經奮勇做淡的「海嘯熊仔黨」，佢哋仲引用近日電視潮語「人生有幾個十年」去形容做淡友的決心，引來過千篇網民的回覆。
不過，市場熱錢充斥，逐個板塊輪流炒，股仔每日的升幅動輒一成以上，就算淡友們想絕地反擊，亦都難以成事。因此計我話，縱使淡友豪情蓋天，但同錢對着幹，亦都難望有好下場。
尋日恒指先跌後回穩，最終收市仍然企穩17,000點樓上。雖然大市表現唔算標青，不過一眾本地地產股受樓盤大賣消息刺激，就升勢如虹。另外，再生能源股亦續有炒作，中國風電（00182）就再升15.38%。