本文重點
工行（01398）坐擁世界最賺錢銀行之名，尋日股東會吸引咗唔少股東慕名而來，一共有1,300人逼爆四季酒店。唔知係咪估唔到小股東咁熱情，大會方面真係「招呼唔到」，一個大堂唔夠畀咁多股東坐，期間又出現唔少「打尖」、「嗌交」嘅場面，足足用咗半個鐘頭有多先將啲股東安頓好。
安排入場花半個鐘
據太子了解，唔少股東係第一次嚟，好似有位股東就話，嚟到都係想拎張餅卡，收吓「特別股息」，不過工作人員話要等好耐，又無得入去親自見董事長姜建清一面，不如返去睇電視。
俗語所謂「三軍未發，糧草先行」，大會之後都安排一車一車（酒店行李車）嘅四季西餅運到。不過亦有股東唔係為餅而來，有股東批評山長水遠嚟到，無非都係想聽吓公司嘅發展情況，點知要去第二間房睇視像，當堂無晒「癮」。