本文重點
香港地依家女多男少，女性嘅地位愈來愈高，作為本地銀行業佼佼者嘅恒生銀行（00011），更可謂身體力行，香港呢邊由梁高美懿（梁太）打骰，依家恒生中國都轉咗由薛關燕萍（薛太）做阿頭，簡直就係女人嘅天下！
與梁高美懿實啱傾
恒生中國本來由符致京做行政總裁，不過佢以私人理由請辭，佢個位就由依家恒生銀行總經理兼營運總監薛太頂上。據講，等內地監管機構批准，薛太就正式上位。雖然發言人話唔知到時薛太會唔會又睇香港，又睇中國，不過薛太到時要駐喺內地，要佢中港兩邊都睇嘅可能性就唔大。
薛太○五年底加入恒生做總經理，○六年升任做營運總監。話說佢同梁太都係由滙豐空降去恒生嘅，薛太本身係滙豐香港區個人理財業務主管。依家梁太有薛太睇中國業務，大家都係女人自然啱傾，睇嚟恒生兩地發展都會好暢順。
中國人做生意，最鍾意就係一邊摸酒杯底，一邊大傾生意經。睇嚟呢樣嘢對薛太一啲都無難度。點解？因為薛太出晒名係飲得之人，本身係滙豐飲酒會元老之一，仲最鍾意飲紅酒。睇嚟薛太以後都要轉口味，飲多啲內地人最鍾意嘅茅台、高粱酒至得。