每年金像獎的「最佳新演員」均令人期待！今屆以無綫姐仔蔡思貝被睇高一線，演繹鬼上身時令人印象深刻，不過要撼贏內地女星春夏有難度，故她不諱言攞獎的機會很微。

蔡思貝睇晒對手的入圍作品，還逐一分析眾人實力。

挾港姐亞軍之名進軍娛樂圈的蔡思貝，早前膽粗粗接拍張家輝執導的靈異電影《陀地驅魔人》，演一名為求真相而十分進取的記者，曾親睹驅魔情況，卻不慎被鬼上身，雖然她的演技仍屬幼嫩階段，但新人來說已算不錯，故順理成章打入今屆香港電影金像獎「最佳新演員」候選名單，不過思貝要面對的還有白只、春夏、蘇麗珊及雷琛瑜，白只及春夏已先後憑入圍作品奪過獎，至於今次鹿死誰手，大家拭目以待。

睇晒對手電影

思貝表示於公布入圍一刻驚喜得打冷震，但冷靜過後也面對現實，不諱言已全數觀賞對手的入圍作品，還逐一分析眾人實力：「白只冇得講，演技有晒認同；我都好鍾意春夏，佢嘅角色畀人睇到深情一面，嗰種心酸係好令人憐憫；雷琛瑜套戲係另類幽默；蘇麗珊嗰套睇完會令你會心微笑。（你嘅角色有咩取勝之處？）我會鬼上身，現實生活冇呢方面經歷，所以都幾過癮，仲要幻想間屋有鬼。（點揣摩？）我出道以來都好多負面新聞，上我身個女仔身世都好慘，為成名付出，我都做幕前，絕對明白嗰種心情，拍嗰時將自己儲落嘅負能量發洩晒出嚟。」當然，思貝身邊亦有兩位影帝前輩張家輝及黃秋生從旁協助，於拍攝時為她調整心態。

開心有份提名

談到對手位位有實力，思貝亦不諱言沒有半點信心：「我又冇信心又冇安全感，所以唔畀咁大預期自己，選港姐時都係隨遇而安，所以今次提名已經好開心，其他嘢唔去諗太多。」

文：影視組

攝：吳文聰

化妝：Jan Chan & Jennifer Chan@ AnnieGChan

場地：如心艾朗酒店