踏入4月2日零時零分，經營足足59年的亞洲電視廣播歲月便正式告終！過去超過半世紀的日子中，亞視捧紅過不少演藝名人，亦曾製造出不少經典劇角色，當中包括智慧與身材成正比的亞姐代表葉玉卿、上世紀70年代叱咤風雲的「大俠」徐少強、家庭主婦「殿堂級偶像」方太方任莉莎、以及已改行從政的「哪吒」方國珊。「亞視出品」即將成為絕響，然而亞視人留下來的人情味，卻為台前幕後津津樂道。

葉玉卿

徐少強

方國珊

方任莉莎

1985年參選亞姐並得季軍的葉玉卿，雖長居美國相夫教子，但對於娘家亞視的動向非常關注，亞視熄機在即，百般滋味在心頭。在亞視一待就是五年的卿卿說：「聽到亞視熄機真係可惜，亞視係我第一份工，呢五年係好好嘅人生經驗，亦都係訓練演技嘅大本營，我一出嚟已經做女主角，真係要多謝邱德根先生畀機會。」

亞視近年收視跌，葉玉卿笑言當年為增加收視，曾想出驚天動地的方法，她笑說：「有人提議要炒咗阿邊個，我就話我有個最好嘅方法，就係炸咗亞視，成間電視台炸咗佢，咁就可以置之死地而後生，可以重生！」

她又寄語說：「每件事都有因果，可能係經營手法或者老闆等化學作用唔啱。可能冇咗係可惜，但係從好嘅方面諗，將來當有間新嘅電視台，如果有新嘅團體或老闆，可能會有更加好嘅節目，對觀眾係好事，大家唔好咁傷心。」

大俠徐少強親揭失場真相

1977年，身為邵氏演員的徐少強獲借將到麗的電視（亞視前身）拍攝劇集《大丈夫》及《天蠶變》，《天》劇的「雲飛揚」一角深入民心，令他紅遍香港及東南亞，風頭一時無兩，然而當《天》劇拍至中段時，竟交代他修煉天蠶神功破繭而出，容貌有變，改由顧冠忠接棒擔演，成為電視史上一大佳話！

談到事後被冠花名「失蹤大俠」，又被指酗酒失場。徐少強近日受訪將事實娓娓道來：「良心講，如果飲醉一、兩日都起番身啦。當時我有好多工作合約喺手，而我本身只係借將嘛，但麗的見收得，即刻加集數，檔期上我真係配合唔到，所以大家有啲拗撬，當佢哋決定換人，我就推薦顧冠忠囉！」他又坦言難忘為麗的拍劇，台前幕後相處儼如一個大家庭，且大讚麗的製作的節目毫不失禮﹕「大家拍嘅時候好搏命，好似套《大丈夫》，真係打到對面台震晒。」

方國珊演哪吒火燒後欄

區議員方國珊為第三期亞洲電視藝員訓練班學生，畢業後在亞視劇《哪吒》飾演哪吒，她憶述當年發生了一件小意外令她印象難忘：「當時要拍一場火爆戲，可能手足落重火藥落得較重手，爆到連我條褲都燒着埋，當時真係好危險。」方國珊又指拍攝劇集《仙女多情》時，遭武指（徐二牛）摑了一巴，令她深受教訓，她說：「當年初出茅廬比較頑皮，我喺片場因發出噪音，結果被正在度招數的武指摑咗一巴仲喊咗出嚟。頭兩年我都好唔開心，覺得佢恰新人，但事隔咁多年，其實覺得呢個係一個大體會令我反省，呢一巴係摑醒咗我。我要尊重每一位在事中的工作中的人員。」

面對亞視數百名員工將面臨失業，方國珊寄語：「人生有悲歡離合、喜怒哀樂，有光輝、有璀璨，亦有衰落之時。無論喜與哀，大家都要互相勉勵。人生唔會一帆風順，只要大家堅強便可以面對。」

方任莉莎撻唔着爐執生

1979年方太開始為麗的電視婦女節目《下午茶》教烹飪，後來更獲監製賞識，讓她「發辦」主持節目《午間小敍》，由於節目相當受歡迎，奠定她「師奶偶像」的地位。談到當初主持直播節目的蝦碌事，她竟難忘第一天走進錄影廠﹕「第一次上電視教煮餸，仲要係直播嘅，點知現場撻極都撻唔着火。工作人員要喺地下爬過嚟睇個爐發生咩事，我就對住螢光幕同觀眾講唔好意思，仲問佢哋有冇試過睇烹飪節目撻唔着火，足足捱咗7分鐘先搞掂。」

受命主持《午間小敍》時，監製向她表示「畀3個月時間去試，冇人睇就一齊死！」壓力之大可想而知。方太表示：「試過有晚心情唔係幾好，錄影時自己爆肚，話節目都唔知有冇人睇，如果有觀眾嘅話，就麻煩大家畀啲反應啦，估唔到第二日行過監製房，佢話畀我聽有一大袋影迷信。（好多太太視你為偶像喎。）我知，依家都有後生仔跑嚟同我講，係食我啲嘢大，我都覺得好開心囉。」

文：影視組、專案組