盛品儒被爆有婚外情，得到老婆蔡一鳳原諒，香港性教育會會長黎定基指女人多數在感情上都留有餘地：「由古到今，髮妻都對老公留有餘地，會原諒老公，不過一話分開，就冇得翻轉頭。所以話，男人長情，女人絕情！」不過，他指女人內心一定會有條難以拔起的刺：「女人點都有條刺，對感情上每件事都刻骨銘心，會記得幾時幾年幾月咩地方，而男人就唔會嘅，老婆原諒咗就咩都唔記得。要淡化女人條刺？男人就要守行為，承諾老婆唔再搞搞震，好似盛品儒今次畀晒密碼老婆咁，都係好方法。」

至於有何感情保鮮方法？他說：「盛品儒有錢又風流倜儻，多女人埋身好正常，要感情保鮮，老婆可以製造多啲情趣，每日瞓喺同一張床都悶，例如有時去旅行搵個有個情調嘅地方增加情趣。總而言之，要婚姻持久，物質已經唔重要，最重要都係情趣同感情囉！」