澳洲型男曉積文（Hugh Jackman）最近拍住Taron Egerton及導演Dexter Fletcher，在首爾宣傳電影《我要做鷹雄》（Eddie The Eagle）。曉積文與Dexter接受本報獨家專訪時自爆「一人有一個夢想」，曉積文小時候愛玩板球，曾期望代表國家出戰奧運，現年50歲的Dexter則自小熱愛體操，曉積文即鼓勵他：「你依家應該仲玩到吊環嘅！」他們更齊齊張開雙臂模仿體操動作，認真搞笑！

Taron拍片冇時停，曉積文則輕鬆得多，仲悶到要扮揭雜誌！

曉積文（右）同Dexter提起夢想即刻郁手郁腳，心思思追夢！

記者模仿片中角色擺出「鞋抽面」，Taron見到亦有樣學樣！

而上陣拍攝多個跳台滑雪場面的Taron自爆捱得過90米高台、增磅及扮「鞋抽面」，反而怕全程黐鬚！曉積文則輕鬆得多，受訪時「秒速」拒絕與Taron互換角色，又自爆拍攝時悠閒得聽音樂，連導演都叫他假裝睇雜誌！

採：鍾沛霖首爾直擊