六年冇拖拍的前港姐朱千雪，去年向無綫請假到中大讀碩士，但原來是為搵真愛鋪路！揚言幸福要靠自己爭取的Tracy在好友岑杏賢穿針引線下尋找真命天子，與「四眼甜心男」相睇撐枱腳，席間他倆雞啄唔斷，最後更唔夠喉直落食埋糖水！採、攝：追蹤組　文：專案組

朱千雪樣靚身材正，奈何冇對象Dry足6年。

朱千雪在岑杏賢安排下與「四眼甜心男」撐枱腳，眾人食飽後一同步出。

岑杏賢（左起）、Tracy、及「四眼甜心男」等轉場到大坑食糖水。

岑杏賢與「四眼甜心男」買糖水，再拎番上車與朱千雪一齊食。

朱千雪日前Dry爆買蛋糕，再全女班睇戲。

前港姐季軍朱千雪（Tracy）於2012年當選後一直備受無綫力捧，但她去年突然向無綫請假一年，於中文大學修讀企業傳播管理碩士課程，自我增值更不忘為感情增值！有樣有學歷兼有家底的她平日生活相當平民化，日前獨自到商場行街的她，先到超級市場格價兼買蛋糕，再到餐廳與朋友慶祝及睇戲，表面Dry爆冇着落，但原來追求者眾有排揀。

飯後轉場食糖水

早前自言Dry爆六年冇拖拍的Tracy，早前受訪時公開五大擇偶條件包括「鍾意食嘢、有安全感、有幽默感、細心及顧家」，更揚言幸福要靠自己爭取！想不到她言出必行，更在袁偉豪女友兼同屆前港姐岑杏賢介紹下尋真命天子！日前晚上六時，Tracy駕車至灣仔某停車場，在銅鑼灣會合女友人後便齊到餐廳食飯，但原來當日的飯局由「媒人」岑杏賢安排，晚飯期間，只見「四眼甜心男」與Tracy有傾有講，「四眼甜心男」更不時大獻殷勤如遞餐牌及打探Tracy的嗜好，傾得甚為投契！而晚飯過後，似乎未夠喉的Tracy、「四眼甜心男」及岑杏賢轉場到大坑食糖水，只見「四眼甜心男」與岑杏賢到糖水舖買糖水時談得相當投契，似乎「發展」得相當順利，最終由於人太多，惟有買外賣上車食，再由Tracy做司機送各人回家。

承認好朋友關係

昨日本報致電Tracy，問她是否與「四眼甜心男」發展中？她說：「佢係我哋其中一個好朋友，只係大家成班朋友食飯，大家諗多咗。（有冇發展中嘅男仔？）多謝大家關心，了解吓，第日如果有再同大家講。」至於岑杏賢則說：「個男仔係我哋嘅共同朋友。（個男仔有冇女朋友？）唔知。」