譚凱琪上位不擇手段

現年34歲的無綫小花譚凱琪（Zoie）近期愈接愈多劇，更透露即將在《致命復活》中扮演一名為人進取的十優生：「劇情講男主角郭晉安畀人綁架，個個都以為佢已經唔喺世上嘅時候佢就『復活』返咗嚟香港，而我係做郭晉安之前間公司嘅其中一位職員，事業心比較強，為咗上位會不擇手段，我喺劇入面亦係一位十優生，個人好進取，讀書好叻覺得自己做嘢都會一樣咁叻，但事實上遇到唔少挫折。我同王浩信會有感情線，喺唔係拍緊嘅時候都會多啲溝通，雖然我哋之前合作過《EU超時任務》，但當時唔係太多一齊拍嘅場口，所以今次真係要事先了解多啲，希望拍出嚟可以事半功倍！另外仲有一場我要同王浩信去攀石，首先我係從來都冇玩過，吊威吔亦係第一次，不過好在自己個膽都幾大，對我嚟講都OK，不過喺劇入面會有泳裝，所以身形都要Keep住！」

百變角色磨練演技

2013年加入無綫的Zoie感恩幾年間嘗試到多個不同的劇種及角色，特別喜歡《EU》劇：「當然我仲有好多進步空間，拍每一套劇都吸收到唔同嘅嘢，同唔同演員合作又學到好多嘢，好似之前拍《城寨英雄》，唔使埋位時都會同陳展鵬、王君馨佢哋圍埋一齊傾演戲，加上同唔同監製合作，每一位都有唔同要求，佢哋見到你邊一方面唔夠好又會教你，令我可以針對性咁改善！我自己都幾鍾意《EU》，個題材幾特別，自己亦多咗戲份，而且我個角色內裏係有少少奸，令感情戲多番啲層次。So Far入無綫到依家拍嘅劇種每次都好唔同，角色亦有好多轉變，自己都好開心，亦知道真係要花更大努力同時間去練習同揣摩！」

做得開心冇嘥時間

Zoie於2000年以歌手身份入行，至今已經16年，她坦言有懷疑過是否適合在娛樂圈發展：「都有諗過係咪嘥咗時間，以前細個嗰陣唔識珍惜任何嘢，做好多嘢都唔知為乜，手頭上有咩工作做完就算，冇乜要求，後期去到做主持，我先識去增值自己，由開頭唔係好鍾意講嘢又唔係好識講，訓練到我識訪問人、做旅遊節目主持，學咗好多新嘢！」

她指做藝人講求耐力，至今未有放棄念頭：「當然你問我可唔可以再好啲，咁當然可以，但我覺得依家都未遲，喺呢一行發展，堅持同耐力好重要，都係睇我有幾鍾意呢份工，我做得開心嘅話唔會去計較係咪嘥咗時間，係有靜思過自己係咪唔啱做呢行，而我曾經都離開過呢個圈子，但發覺自己掛住呢份工，好似有個癮咁搣唔甩，既然仲有機會畀我去做，我會一路試，直到有一日真係唔再適合，我會再悄悄咁離開。」

後記：唔滿足

Zoie在新劇《致命復活》中飾演進取女生，但她表示現實生活中的自己過分知足是個缺點：「我成日都處於一個好易滿足嘅狀態，其實應該要學習一下不滿足嘅心態，有時滿足得滯、太安於現狀都唔係一件好事！要畀多啲空間自己多啲學習，本身我亦都係比較被動嘅人，但係依家有一直改變緊，成日不斷叫自己唔好咁怕醜、主動啲同人講多啲嘢！」

文：陳丹

攝：劉智源

場地：The Mill

服裝：Amelie Street

髮型：David Ko（HH）