前亞視高層盛品儒與太太蔡一鳳突然爆出「小三事件」，令婚姻關係頓成焦點，心情明顯受影響的蔡一鳳受訪時一度哽咽，但她決定原諒老公，令盛品儒「大翻身」！他倆昨晨拍拖到泰國旅行，蔡一鳳向「小三」示威：「多謝呢個女仔，令我知道男人係會返屋企嘅！」文：影視組

盛品儒見蔡一鳳嘴扁扁，即攬實老婆呵番。

蔡一鳳受訪時一度哽咽，盛品儒即代為解答。

盛品儒傍實老婆辦登機手續，蔡一鳳應該唔會嬲豬啦！

盛品儒日前被「小三」Tasha大爆關係親密兼曾懷有身孕，蔡一鳳對此一度怒不可遏，想不到事件突然「大逆轉」，她與盛品儒昨晨拍拖現身機場，出發到泰國「再度蜜月」。二人接受記者訪問時，蔡一鳳禁不住哽咽及心情明顯受影響，但她表示已原諒老公：「佢平時點對我，自己心知，人哋嚟玩乜，一早計劃咗！多謝呢個女仔，唔理係真係假，呢件事令我知道男人係會返屋企！老公咁耐唔理佢，Block晒佢，仲要纏住見面，我覺得夠喇！老公喺我唔知情下已唔想見佢，佢應該放手！我哋有屋企人，唔只自己，你（Tasha）做得好過分呀﹗」而盛品儒則在旁安慰老婆：「我覺得佢癲癲哋，應該考慮睇心理醫生！」

「真愛點都推唔走」

問到日後會否與老公約法三章，或要求老公不時報告行蹤，蔡一鳳說：「真係愛嘅，拉太緊要走就走，唔走就唔走，呢位小姐要清楚明白，男人愛嘅，點推都唔走！」而盛品儒則說：「佢（Tasha）點講就點講，佢癲嘅，唔使回應。我同太太互相支持，男人受引誘，最重要識返屋企，太太同屋企人受到影響，我要講聲對唔住！」其後二人飛抵泰國，蔡一鳳先後在Facebook留言：「何止困擾，根本係騷擾…」、「是的，這件事讓我明白了：愛你的男人係會識得返屋企的路！」明顯向Tasha「示威」。

Tasha冇諗過受傷

而揚言稍後會離港散心的Tasha，昨日接受本報電話訪問時指已受到困擾：「連日嚟大家都為呢件事困擾，我唔想亦都冇諗過三方面都受傷！我估唔到佢（盛品儒）會話我癲！我真係好傷心，不過我都好多謝佢，令我今年上咗一課！我唔係娛樂圈嘅人，真係冇必要承受呢啲壓力。點都好，人係向前望，我希望大家各自展開新生活，家人對我呢件事咁擔心，我都覺得好抱歉！」另外，她已刪除Facebook及討論區的留言，明顯想事件告一段落。