樂壇姊妹花SiS樂印姊妹為新歌《新世界》MV找來農夫的C君擔任「毒宅男主角」，她倆大爆邀請C君時不斷受推搪，C君更一度向兩人硬推以「毒」聞名的吳業坤，眼見坤坤現在人氣急升，兩姊妹即笑言「蝕咗！」文：音樂組　攝：劉斌

SiS樂印姊妹感情要好，拍住唱歌搵銀冇難度！

駱胤鳴已名花有主，駱胤樺要急起直追喇！

組合SiS樂印姊妹於2014年孖住勇闖樂壇，更爆冷奪得「叱咤樂壇生力軍金獎」，經歷一年沉澱，姊姊駱胤樺（樂樺）和妹妹駱胤鳴（烙印）終於帶着新歌《新世界》重返樂壇！本走小清新路線的兩人在新歌中破天荒加入電子曲風，笑言要改行「動漫曲風」，突破舊有形象，負責寫歌的妹妹烙印說：「寫嗰時啱啱聽完農夫《偉大航道》，『偉大航道』係《海賊王》嘅字眼，但依家佢哋已經進入咗『新世界』，但新嘢再做會同舊嘢唔Match，所以就加入咗我好鍾意嘅初音未來電子風。」

慘食檸檬

烙印又大爆曾聽聞C君很鍾意家姐，但在邀請C君時卻慘食檸檬，C君更向她倆硬Sell當時仍未奪新人獎的吳業坤：「但個角色好啱C君(口架)！係一個成日喺屋企嘅宅男，如果搵坤坤，個劇本就要改過，坤坤個感覺應該係毒到眼神有啲污穢Feel，結果C君都畀我哋煩到應承咗，早知搵坤坤啦！佢依家身價暴升！」

錯失姻緣

烙印又爆料指C君拍攝當日抱病出席，家姐事後有發短訊向他道謝，但久未回覆，她即笑言沒辦法為家姐介紹好姻緣。提到妹妹已名花有主，樂樺可會羨慕？她笑說：「會羨慕呀！我有睇運程書，愛情運今年係OK，話會遇到外形同內涵都好好嘅男仔，本來我係追求內涵，但麥玲玲師傅話我嗰個有外形(口架)！所以我會等到(口架)！」

髮型及化妝：Rita Leung

服裝：mini cream

場地：MioXpace