帶女友試床睇單位 陸浩明鋪路結婚

「靠把口」愈撈愈掂的陸浩明，原來早已「私藏」模特兒女友Ayan Chan，更已拍拖四年。據知，收入大增的他最近搵樓「試婚」，日前被《東網電視》追蹤部隊發現他相約女友到銅鑼灣一間傢俬店，睇定家具及到地產舖搵樓。兩人行到傢俬舖床品售賣部，陸浩明即衝向一張雙人床，並興奮地坐在床邊狂Un試彈力，怕醜的Ayan只在床邊陪坐，被愛郎的「高潮樣」氹得哈哈笑。兩人轉戰揀枕頭，更即場上演枕頭戰！離開傢俬店後，陸浩明與女友急急往天后睇樓盤，還與Sales到附近的樓盤睇示範單位，希望「試婚」之愛巢既舒適又交通便利。