昨日Tasha接受本報電話訪問，指和盛品儒於去年初透過Facebook認識及發展親密關係，更出示多張和盛品儒（James）的對話截圖，當中包括有James留言「Haha」及附上酒店地圖，她稱在討論區公開兩人關係純粹是宣洩：「我哋舊年一、二月喺Facebook認識，當時我都唔知佢係邊個，見佢張相幾靚仔，當時佢仲話自己冇老婆，之後大家有約出嚟見面。大家有去大家屋企，亦都去過兩、三次酒店。（去酒店做乜？）呢啲唔講啦！問得咁仔細，大家明啦，Meet Up囉！其實我之後都知佢係有老婆，我有提出過大家唔好見。」

Tasha稱直到四月時，曾接過蔡一鳳的電話：「當時佢打嚟鬧我，我有喊、有講對唔住。但第二日朝早，James就打畀我話：『BB你唔好嬲，我老婆尋晚好惡、發好大脾氣！』跟住我哋又再保持見面。直到我七月生日，佢仲話一定要安排食飯慶祝。」

Tasha指交往期間有主動提出分手，更編造和舊愛翻撻的理由：「當時James都話OK，佢話我跟隨番自己感覺就可以，但到九月時James又主動搵番我。我係鍾意佢，佢搵番我，又成日話叫我等佢，我話晒係一個女仔，當然冇抗拒。」之後Tasha和盛品儒開始減少見面，源於盛品儒常要到外地工作，Tasha說：「我哋最後一次見面係一月二號。（有冇進行親密性行為？）點會冇！大家識咗咁耐。」她聲稱本來於上星期二，約定本周三見面：「因為我哋好耐冇見，我有詐型發脾氣，但約咗之後，佢開始話自己忙，我有問即係想點，之後發現佢電話Whatsapp等去Block我。」她說有感對方冇一個正式交代，有苦無路訴，故在討論區訴苦：「我同James咁耐，真係鍾意佢，冇諗住得到啲咩，點解唔正式畀個交代我而去玩消失？James都係上星期先知我六月有BB，當時佢話我一直冇提，大家以後都唔好提。早兩日蔡一鳳有打畀我，佢代佢老公講對唔住，我都有話想約出嚟傾清楚。」至於蔡一鳳在Facebook反問是否要告她誹謗及通姦，Tasha說：「我有證有據，點告？告通姦豈不是告埋佢老公？」