方力申與鄧麗欣驚爆分手，令人詫異及可惜之餘，亦為這段無疾而終的十年情留下多個問號。「知欣莫若霏」的好姊妹吳雨霏早知「分」訊，還力撐沒秘婚不成及小三介入這回事；至於曾合作電影《紀念日》的邵仲衡，不諱言當時已察覺他倆「冇乜偈傾」，似乎分手早有先兆。文：影視組

Stephy與小方早前孖住出席Alvin Goh的生日會，是分手前最後一次一起出席活動。

Kary指小方一直不肯結婚並非分手的主要原因，唔通係另有內情？

方力申與鄧麗欣（Stephy）突然分手，令一眾好友及曾合作的藝人大感驚訝及可惜，好姊妹Kary表示早已知道「分」訊：「都一陣子，我諗畀啲空間佢哋兩個處理。」又否認兩人秘婚及第三者傳言：「冇秘婚，講過十萬次，都冇第三者，我諗十年感情，我哋局外人一、兩句講唔到乜嘢，係可惜，留畀佢兩個交代。」有指小方一直不肯結婚導致兩人分手，她說：「我諗十年感情唔係淨係呢個原因，可能有其他因素，點都好，作為好姊妹我支持佢！」而同公司的小肥昨日出席澳門活動時坦言早幾天已聽到消息：「十年感情冇咗係可惜，但冇諗到會有呢一日。」

天明事前不知情

而在《紀念日》中飾演Stephy父親的邵仲衡接受本報電話訪問時，直指他倆當時已「冇乜傾偈」：「冷淡相信係因為要投入角色啫！冇見過佢哋嗌交嘅！」他又以「過來人」身份指與圈中人拍拖很大壓力：「我有同小方、Stephy講拍拖拍得啱就早啲結婚，當時佢哋笑一笑，我覺得拍得耐好難Keep，希望佢哋再試吓掹吓，復合到係好事，如果試過都係唔得就向前走，我點都祝福佢哋！」而與二人合作多部「愛」字系列電影的導演葉念琛則以短訊回覆：「兩位也是好朋友，尊重他們的決定，也祝福他們的未來。」

而小方老友洪天明坦言對事件感驚訝，更指事前全不知情。至於小方波友張繼聰對分手一事避而不答，問到小方最近心情是否十分低落？他說：「都係唔容易，佢哋兩個都係好成熟嘅人，相信佢哋會處理得好好。」曾與方力申合作遊戲節目的陳靜，昨日出席活動時大感可惜，但相信他們是在協議下和平分手。

今推DVD被嘲諷刺

此外，紀念方力申、鄧麗欣與葉念琛的《獨家試愛》十周年電影《紀念日》（感動加長版）DVD今日推出，發行公司在社交網亦有張貼此事，不少網民留言：「又會咁啱呢個時間出嘅？真係攞景又贈興！」