《東網巨星》：黎明金句教路籲勿輕生

黎明（Leon）將於下月舉行《黎明LEON 30TH ANNIVERSARY RANDOM LOVE SONGS 4D IN LIVE 2016》演唱會，他近期在網絡超級活躍，今次Leon更為《東網巨星》的讀者解答問題，無論人生哲理、戀愛、投資，甚至個人問題Leon都有問必答。關心時事的他被問到近日學生自殺問題時，大力鼓勵學生多想開心的事物！

Leon並非空口講白話，以實例教大家「尋開心」，談到有關姻緣問題時，他即時「月老」上身大講緣分，問到會否再婚時，他笑言太恨結婚可能會受到更多磨練：「真係冇人知，都係隨緣啦！」至於港人最關心的「錢途」問題，Leon則教路要適當投資，千萬不要貪心，亦不要勉強做「樓奴」，多次強調「做人最緊要開開心心」！

做爸爸要睇緣分

Eason：黎明哥哥，我想問你，近排咁多學生自殺，你有咩方法可以鼓勵佢哋呀？

Leon：近排咁多學生自殺，覺得有乜嘢可以鼓勵佢哋，咁我諗唔會自殺嘅點都唔會自殺啦！咁自殺嘅人喺之前應該未有人鼓勵過佢哋，咁我依家覺得最緊要正面啲，盡量去諗多啲開心嘅嘢，早睡早起，第日再睇吓需唔需要有呢個決定，其實每個人命運命數都有注定，咁當然係一件唔開心嘅事，但我相信若然正能量夠嘅同學知道自己目標係唔會做呢樣嘢，係目標比較含糊或者自己比較失落先有咁諗法，盡量開心啲，開心完仲要諗自殺先再考慮。

Eason：黎明哥哥，你覺得自己最娘同最Chok係咩時候呀？

Leon：我最娘最Chok，咁我梗有娘嘅時候，但自己娘嘅時候，自己未必注意啫！因為有啲娘唔係太娘嘛！娘梗有啦！咩時候，呢啲喺係自己唔知嘅情況下發生咗娘嘢，有時可能啲人覺得我講金句都係娘，原因就係你哋用呢個字嚟笑人。

王太：Leon，你有錢又靚仔，係筍盤，你揀女朋友有咩條件呀？

Leon：其實我揀女朋友冇乜條件，因為我工作時間太長，同埋唔係好識得分配時間，成日做嘢，我覺得如果香港狗仔隊唔再影我哋藝人嘅時候，我哋私人時間可以出去行吓街，咁自然就識到女仔，但通常未識到已經畀人影咗相拎去賣錢，係嘛，呢啲報紙雜誌老闆自己繼續拍拖，對我哋啲藝人好唔公平。唔好影，等我哋自己上Facebook自己Share出嚟啦！

王太：Leon，你幾時做爸爸呀？幾時想呀？

Leon：你抱住小朋友就問我幾時做爸爸，我冇抱小朋友，我覺得做爸爸都要睇緣分嘅，當有小朋友時，你嘅工作完全Handle到又照顧到小朋友，跟住先去照顧，因為好大責任嚟！始終每個人命運唔同，唔係爭唔爭取，如果爭取完你個婚姻唔係咁長遠嘅，當多個仔多個女都可以Handle，始終生活喺亞洲唔係美國，變咗隨緣啦！有我都唔抗拒，但呢分鐘我唔會諗住。

百年歸老錢點使

譚太：Leon先生，想問你百年歸老時啲錢點樣使呀？會唔會畀你老婆同啲仔女呀？

Leon：我百年歸老啲錢點使？人應該正常嚟講人愈大使嘅錢愈少嘅，咁後生時能夠使嘅，恰當嘅咪使吓囉！唔係叫揮霍嘅，咁你覺得我賺嘅錢好多，其實好多時候會投資番落呢行，始終我嘅錢係大眾畀我，我都會做番啲娛樂嘅嘢，提供番畀觀眾囉，事業心啦！幾樣嘢加埋都有嘅，百年歸老後點，我都冇諗過呢個問題，諗太多唔好。

譚太：黎先生，請問你會唔會再結婚呀？離咗婚？

Leon：會唔會再結婚呀……好難講，你咬死話唔再結婚，可能將來又結婚，你話好希望結婚，可能上帝又話恨呢樣嘢，咁就畀多啲磨練你先，等你80歲先結婚，可能第二日就重新投胎，真係冇人知，都係隨緣啦！

陳先生：黎生，我有嘢想問呀！我女朋友成日都日嘈夜嘈好鬼煩，有冇辦法可以令佢收聲呀？賜吓橋呀！

Leon：女朋友日嘈夜嘈，冇乜辦法叫女朋友唔好嘈，咁又唔可以教壞人，有時啲小朋友，好細個時BB仔BB女好嘈、好百厭，有啲媽咪就好離譜畀啲睡眠劑佢哋食等佢哋唔好嘈，但女朋友嘈嘅話，我諗你揀過個算喇！你揀過個後，到時鍾意咪追番佢囉，來來回回係啦！冇辦法Stop佢，Stop唔到。

陳先生：Leon，我有個Friend四十歲未結婚，有冇辦法幫佢搵個老婆呀？譬如有啲咩明星介紹畀佢呀？

Leon：如果四十歲都未結婚，未搵到老婆，唔緊要嘅，睇佢係咪一個事業型，有能力，我聽講我有個朋友嘅朋友嘅朋友，佢都好有錢，到四十幾歲都未結婚，識到個女朋友，女朋友生日嘅時間就同佢阿媽一齊放咗個生日蛋糕喺中間，個生日蛋糕就放晒一間好大好靚屋，而佢嘅生日願望就係間屋！咁你撞到啱嘅，咁就唔講錢講心，撞唔到嘅就擺金同情放埋一齊，視乎你自己際遇，四十歲結唔到婚好正常啫，呢個世界好多人都冇結婚啦！但係如果你有緣分搵到愛嘅，「冇得強求」四個字，睇運。

唔係男神自認凡人

曾先生：我想問吓黎明，你有咁多金句，有冇諗過出書，或者開棟篤笑，同埋邊句金句，你係最鍾意？

Leon：冇諗過開棟篤笑，亦冇諗過寫金句，其實我諗唔係金句，我北京出生，喺北京嘅胡同、四合院裏面，好多小朋友，講嘢都好多文句式反映第二個意思，習慣咗嘅時候有呢個基因，嚟咗香港，潛台詞都有呢個基因，其實好多時一句嘅句子裏面有第二個意思嘅，但我返到北京啲人話我講嘢太直，有好有唔好，其實在乎你邊度出世，環境好影響你嘅吸收力，而吸收力變咗做人講嘢，影像表達未必明，但個意思應該喺度嘅，如果完全唔明，你哋都唔會認為係乜句物句啦！

曾先生：黎生，你話你唔會空肚食早餐，咁你食早餐之前，會食啲咩呀？

Leon：唔知啲人點解會話我唔會空肚食早餐，不過，空肚食早餐呢樣嘢，通常朝早起身都會飲杯水先啦！我唔知點解有呢句說話，我好似冇刻意講過，可能畀人扭轉咗嚟講。

梁小姐：黎生，你仲可唔可以重演當年嗰句經典嘅廣告對白呀？May，你點呀?

Leon：May你點呀……

梁小姐：黎生，你平時喺屋企鍾意做啲乜嘢？你會唔會煲劇呀？好似韓劇咁樣呢？

Leon：我唔煲韓劇架，我冇呢個習慣，韓劇以前有睇過，但早啲快啲，依家睇鬼佬劇多啲。

王小姐：Leon，我想問你，邊個係男神同埋女神，同埋覺得自己係咪男神呢？

Leon：我絕對唔係男神，係凡人，你心目中覺得邊個係男神就將佢張相貼喺床頭、廁所對住，但都唔會出現，神又點會出現人面前呢！

王小姐：Leon，我想問你，我同男朋友好想上車呀！點樣可以快啲上到樓呢？

Leon：買樓嘅地方你要計一計，有冇諗過將買樓筆錢不停嚟租樓，又可以換，如果啱自然買到樓，點解唔租？一定要買呢？一定要供，一定要做供樓奴隸呢？呢個唔係好明，係咪先，有時諗上海咁貴，但買咗有幾何會住，一年先去一次住五日，你住最靚嘅酒店使你幾多錢，其他錢可以做其他嘢，點解要將八百萬放喺上海嘅樓上面，呢個我睇法，每個人對錢睇法不同，視乎你滿唔滿足，你同男朋友一齊最緊要個地方令你開心啫，開心工作順利自然會買到你想買嘅樓。

長線投資不要貪心

丁先生：我想問聲你，因為人哋都講你投資有方，想請教你點樣投資會更好？

Leon：第一，有人話我投資有方，邊個話你知我投資有方先？冇證冇據，總之唔好大咬，唔好太貪心，做人就會開心，投資都係唔好太大咬，因為正常嚟講你追，愈追先會愈輸得愈甘，總之到咁上下就夠，長線投資就擺埋一邊唔好睇，短線就似感情要斬就斬。

文：音樂組

攝：劉智源、吳文聰、司徒國榮