近年不少明星都加入運動行列，積極跑步做Gym操Fit自己，而泳兒和羅力威則參加馬拉松比賽，還自言跑步跑上癮！問到何時與男友拉埋天窗，泳兒即Sweet爆說：「睇吓到時求婚個氣氛點啦！」

泳兒享受跑步獨處的時間，將憂愁面孔憂愁內心統統放下！

泳兒和羅力威參賽之餘又可以同卡通人物影相，一舉兩得！

羅力威

咪睇羅力威好似柔弱書生咁，原來係運動健將！單手掌上壓都冇難度！

跑步前做足熱身是常識吧！泳兒都嚟拉拉筋先！

泳兒和羅力威同屬跑步愛好者，故兩人相約於本月20日參加《DORAEMON RUN 2016》，挑戰4公里比賽之餘，更可在比賽過程中與不同主題的卡通人物拍照，將玩樂融入跑步中！

自覺好勝唔願輸

談到如何做賽前準備，有比賽經驗的泳兒自言一向有跑步，故今次毋須特別準備。而首次參賽的羅力威笑言隔日跑步操練已足夠，他認為跑步能改善其冇耐性的缺點，又自爆讀書時是短跑冠軍，曾為學校摘下不少獎牌：「我屋企好多金牌，不過全部都係短跑、接力、跳高、跳遠、跨欄！可能大家睇唔出，但其實內裏嘅我係好有運動細胞！（好勝？）正常好勝心都有，始終冇人想輸！」

甜笑等男友求婚

而母親於去年底腦中風的泳兒透露這段時間背負沉重壓力，情緒很波動，跑步能讓她好好放鬆：「有一個屬於自己嘅空間，嗰一個鐘入面可以放低晒所有嘢。」她表示起初對跑步沒有太大興趣，但後來覺得跑步比其他運動有趣，愈跑愈舒服，且帶來很大成就感。她又自嘲「歇斯底里」：「決定咗要做就一定要做到為止！」至於問到男友可會陪跑？泳兒笑言男友不喜歡跑步，但有機會也想嘗試一起跑步的滋味。提到感情穩定，如男方突然求婚，可會接受？她即甜笑說：「睇吓到時個氣氛點啦！」

文：音樂組　

攝：樊愛慈