近期不少不法之徒利用社交網站冒充藝人來搵着數，今次受害人是袁嘉敏，她昨日於微博公開指有人冒充她超過大半年，並有藝人受騙。由於事態嚴重，袁嘉敏已報警，但因不涉及金錢損失，自知難以追究，故此她決定公開騙徒電話，希望不要再有人受騙！

袁嘉敏昨日於微博公開一個電話號碼，指自己近期被該電話號碼持有人冒認，其後她接受電話訪問時說：「呢個人用Facebook冒充咗我大半年，主動去聯絡一啲藝人，之後問攞手提電話，用一啲Social Apps去傾偈，進一步去建立友誼，仲經常講到自己晚晚去飲酒，好似好唔開心，想做傻事咁！有啲藝人好有愛心，同佢一傾就傾咗兩、三個星期，之後嗰個人講嘢就愈嚟愈露骨低俗，又話會出埠做一啲不道德交易，繼而叫啲藝人介紹工作咁，令到啲藝人有懷疑，之後問番先知嗰個唔係我。」

不涉金錢損失

袁嘉敏今年一月就被冒認事件報警，她說：「由於呢件事好影響我形象，所以今年一月去咗報警，但警方話唔涉及金錢損失，好難拉佢，警方試過打畀嗰個人，但又冇人聽電話。」

事態愈見猖狂

由於冒充她的騙徒近期愈來愈猖狂，令袁嘉敏忍無可忍，昨日決定於微博公開其電話號碼：「因為都成大半年，再加上有啲藝人同我講個問題好嚴重，所以我決定公開嗰個人嘅電話，希望嗰個人以後唔好煩我！」

文：影視組