女團Super Girls（SG）首度接拍婚紗廣告，變身「索爆新娘團」，當中以Cheronna身材最為搶眼！她們都希望現實生活中能齊齊嫁出，但Aka卻擔心50歲後才嫁杏有期，怕會「累街坊」。

Aka自爆命格遲婚，怕累姊妹50歲才嫁得出。

穿上婚紗的Cheronna勁有睇頭，一改平日男仔頭形象。

（左起）Jessica、Heidi、Yanny、Aka、Cheronn
SG齊披上嫁衣，預演將來一同出嫁的日子。

SG有機會一嘗婚紗之美，而且更「食過翻尋味」。

女團SG平日工作已日見夜見，連將來嫁人都想同日出嫁。不過，Aka被相士批命格遲婚，要人到半百才嫁得出，難怪心灰地說：「一齊睇嚟難啲，如果大家唔介意等我咁耐嘅話。」其他四人則說：「或者我哋都遲呢！」提到工作令Aka有機會一嘗婚紗之美，她說：「好感觸，我有諗過趁年輕影定先，怕51歲先影會走晒樣，或者每年都影一次，到時就Key番個新郎落去。」

同日擺酒賺多啲

至於「數口精」的Yanny則笑言一同結婚是好事，可以一次過請公司同事飲喜酒，酒席平分，但人情就收足五份。問到可有信心30歲前做新娘？五人中只有Heidi點頭，而Aka則自求多福說：「我做多啲善事，希望可以早啲結婚。」Jessica和Heidi即鼓勵她說：「一係我哋嫁時你做姊妹，可能會對伴郎團有興趣。」

Cheronna身材最爆

另外，平日男仔頭的Cheronna穿上婚紗時身材竟然最「澎湃」，她說：「着婚紗好高貴，仲要紮到咁緊。」Heidi又透露兩周前開始Keep Fit，亦只有她有「新郎」相伴拍照，而且有親暱鏡頭。問到是否抽籤抽中？四人即爆Heidi今年桃花旺，而Heidi更抵死地分別摸成員的頭說：「分啲旺氣畀你哋。」

文：音樂組

攝：李柏儒