「宇宙最強」甄子丹昨日出席馬場活動，首次帶妹妹甄子青一同亮相，他表示已與從小習武的妹妹簽約，又大讚妹妹功夫了得，稍後會安排子青參演電影，力捧她做新一代女打星。文：名人組

子丹讚愛駒多肌肉、身材Fit爆。

子丹讚從小習武的妹妹子青功夫好勁。

甄子丹昨日以打吡大使身份出席《2016寶馬香港打吡大賽》獲選參賽馬匹名單公布會，他首次帶親妹甄子青亮相：「子青功夫好勁，娛樂圈要搵打女幾難，特登搵佢返來，簽了我公司，佢由細練到大，功夫超越好多人，會安排佢參與電影演出。（兄妹檔？）睇太太的安排，佢有Potential先會簽。」

愛駒初次出賽

子丹與蔡加讚的愛駒「宇宙車神」昨晚初次在港出賽，問到是否緊張？他說：「唔緊張。（想拉頭馬？）拉就梗係開心，隻馬身材好Fit，好多肌肉，同我差唔多。」他又透露原本昨晚要到南美洲繼續拍攝與荷里活男星雲狄素（Vin Diesel）合作的電影《3X反恐暴族3》：「依家改了聽日（今天）飛。呢排好難操Fit，又要肥又要瘦，部戲全部演員都好大隻，我代表中國演員要Keep Fit啲先得。（有壓力？）冇，上次同泰臣合作都係咁。」

觀眾感受最重要

提到主演的電影《葉問3》內地票房坐火箭受質疑，子丹說：「演員做好自己本分，電影在唔同地方有佢的發行方式，呢部戲破了好多地方的票房紀錄，同埋得到電影獎項的提名。票房都係浮雲，最重要係觀眾睇完的感受。」