文詠珊全裸玩SM衝擊影后

文詠珊14歲便獲星探發掘成為「嫩模」，2007年開始參演電影，近年不時在影壇挑戰自己，接演難度較高的角色，如去年拍攝《赤道》飾演冷艷殺手，片中與張家輝打到飛起，毫不錫身，連影后舒淇都在微博激讚！最近，JM再有新突破，接拍由邱禮濤執導的懸疑電影《兇手還未睡》，片中飾演心理狀況極度複雜的女子，角色沉重，當中更有一場全裸被虐戲份，尺度大膽，對其演技亦是一個大考驗。電影公司一直保密處理這一幕，但電影海報將於本月14日舉行的影視展上發放，其全裸劇照終告曝光！

壓力爆煲失眠

海報中的JM全裸上陣，被五花大綁在床上，眼神楚楚可憐。由於尺度大，她坦言經過一番深思熟慮後才決定接拍：「今次接拍呢套戲真係要衝破好多心理關口，接到劇本都用咗兩星期去考慮，亦同導演邱禮濤開咗幾次會。劇本真係好好，我唔想錯過一個咁好嘅角色，所以最後都決定接拍。喺開拍前一個星期，我都擔心好多嘢，除咗嗰場戲（全裸戲）外，仲擔心自己究竟駕唔駕馭到個角色？點樣先可以演到有層次感？總之好多嘢諗，成個星期都失眠，壓力大！」

不過，電影開鏡後她不再失眠，反而鬆了一口氣，因為她成功駕馭角色，連導演邱禮濤都讚好！提到全裸被虐戲，她坦言拍攝前心情忐忑，但埋位後便不再多想，索性豁出去：「接咗就一定要做到最好，拍嗰陣冇特別清場，只係一心想演好個角色，所以一開機就入咗戲，根本冇時間諗其他問題。我冇尷尬，亦冇怯場，每個鏡頭都一至兩個Take就搞掂！」

片酬跳升百萬

JM近年在影壇表現出色，贏得不少導演的青睞，稍後將接拍由鄭保瑞監製的《狂獸》。深得導演歡心的她今年入圍金像獎最佳女配角，在《兇》片對JM施暴的林家棟亦對其表現讚不絕口：「眼前一亮，幾年前喺紅地氈見過，當時覺得佢好Charm，今次合作覺得佢係好好嘅對手，大家好有火花！」而與JM半裸共浴的許志安同樣很欣賞拍檔：「佢好信任導演、劇組同埋我，清楚故事發展需要好大膽，我好欣賞佢嘅付出！」

而對於是次豁出去演全裸戲，日後可想向影后之路邁進？JM說：「今次真係豁出去，當然希望有成果，亦好多謝各方導演同電影公司畀機會我，我會繼續拍好每一部電影，唔想令佢哋失望！」她在影壇嶄露頭角，片酬亦隨之上揚，據知其片酬已由100萬升至200萬，她笑說：「片酬嘅嘢我唔清楚，交番畀公司幫我搞，不過若果大家想鼓勵我，我當然開心啦！」