天王郭富城與熊黛林（Lynn）曾拍拖七年，無奈於2013年分手，之後各自各精彩，城城近月情歸上海（口靚）模女友方媛，而Lynn則答應現任男友郭可頌求婚。城城昨晚出席導演會活動，大方向舊愛送祝福：「我有留意新聞，我衷心祝福佢，其他就唔回應喇！」

城城奪得導演會「最佳男主角」，開心之餘，不忘祝福熊黛林。

城城透露最近在上海忙於拍攝電影《新永不消逝的電波》，最辛苦是在零下九度拍受刑戲，提到早前弄傷左腳舊患，他透露月底要做手術：「依家行都有啲痛，手術後頭一星期都要用拐杖，一個月後先做到運動，未決定留喺醫院定返屋企，大家唔使擔心，個手術做個幾鐘啫！最緊要之後覆檢勤力，原本四月中接咗套戲，好彩電影公司肯遷就。」他透露治療師曾為周潤發治理，問到之後女友會否來港照料？城城即面露甜笑表示「唔回應」。城城憑電影《踏血尋梅》贏得導演會「最佳男主角」，他在台上說：「有獎就係鼓勵，會繼續努力！」他受訪時直言心情非常開心：「冇諗過有獎！今次係導演選出嚟，意義更大！（想同邊個分享喜悅？）梗係經理人小美啦！大家一齊走過廿年！（更有信心贏金像獎影帝？）未知數，獎係鼓勵，最緊要演好自己嘅戲。」