三屆視帝羅嘉良昨日為無綫劇《與諜同謀》開工，與女主角李佳芯（Ali）在尖沙咀拍攝車廂內傾談的場面，狀態大勇的嘉良與工作人員談笑風生，又和路過的Fans合照。面對前輩的Ali則似乎頗為緊張，不時睇Playback，嘉良見狀即主動撩她傾偈，氹得Ali揈手側頭又掩嘴笑，動作多多！

首次擔正即與前輩嘉良合作，令Ali非常緊張！

嘉良發揮幽默本色，氹到Ali側晒頭，唔知傾咩呢？

在車廂內對戲的嘉良和Ali神色凝重。

自言自小看嘉良演出的Ali讚前輩Nice爆，並難忘其歌聲：「自從知道要同佢合作，佢首《准我留下》不停喺我腦海Loop。（叫佢唱歌？）係喎！要同佢講，想聽佢唱Live呀！」「回歸」拍劇的嘉良表示感覺良好，並大讚Ali：「佢演出好穩，又有幽默感。（佢話想聽你唱歌！）睇吓幾時有時間，一齊去卡拉OK囉！（預咗拍劇辛苦？）我知監製會錫住我，畀時間我休息。」他表示不介意出動私伙靚衫，笑言倒貼打工是其興趣，更即場戴黑超Chok甫。