陳瀅、陳豪及蔡思貝等昨日出席新劇《潮流教主》宣傳，沐浴愛河中的陳瀅透露有網上重溫劇集，也有留意網友對其角色的評論，指朋友取笑她戲中性格鵪鶉，與現實生活判若兩人。問到平日是否很惡？她笑說：「OK啦！我有話直說，但唔會諗計仔。」問到男友何猷亨對她演技有何評價？她即面紅說：「咪就係佢講囉！（如果男友話你做得麻麻會唔開心？）任何人講都唔會，如果係咁就冇進步。（同男友一齊睇劇？）好熱呀，哈哈！有嘅！（套劇冇感情線男友放心？）自己未有機會同其他男演員合作，緣分都係同女仔多啲。」對於蔡思貝被指以高聲線演戲，陳瀅說：「已經唔算好高，佢笑聲比較高啫！都幾煩，但其實佢幾活潑。（觀眾話罷睇，驚唔驚影響收視？）咁嚴重？等我返去睇吓先。」

陳瀅（左）笑言蔡思貝笑聲比較高，其實相當活潑！

快將再做老竇的陳豪，宣傳時笑到見牙唔見眼。

蔡思貝則表示不會為網友批評而不開心：「都係善意提點，可以令我改進多啲。（有觀眾話寧願睇亞視都唔睇你！）係咩？唔鍾意一定有，咁佢哋惟有睇自己鍾意嘅嘢，相信都會有觀眾鍾意。（陳瀅都話煩！）我哋喺片場都係互相煩來煩去嘅。」而陳豪則透露太太陳茵媺將於五月生BB，但BB性別則交由太太公布。